Душанбе, 25 май, – АИ «Корвон Иттилоот». Ҳамкориҳо байни Вилояти Мухтори Кӯҳистони Бадахшон ва вилояти Оши Ҷумҳурии Қирғизистон ба марҳалаи бештар амалӣ ва пурмазмун мегузаранд. Дар доираи сафари корӣ ба вилояти Ош раиси ВМКБ Мирзонабот Алишер Худобердӣ бо намояндаи ваколатдори Президенти Ҷумҳурии Қирғизистон дар вилояти Ош Кенжебаев Аманкан Батырбекович мулоқот анҷом дод.

Аз ҷониби Тоҷикистон дар ин вохӯрӣ ҳамчунин раиси ноҳияи Лахш Каромиддин Холзода ва дигар аъзои ҳайат иштирок намуданд. Дар ҷараёни суҳбат муносибатҳои тиҷоратию иқтисодӣ ва иҷтимоию фарҳангӣ дар меҳвари таваҷҷуҳ қарор гирифтанд.

Ҷонибҳо таъкид карданд, ки дар заминаи сиёсати дӯстона ва ҳамсоягии созандае, ки сарони ду кишвар пеш мебаранд, барои густариши ҳамкориҳои байниминтақавӣ заминаи мусоид фароҳам шудааст. Ин замина на танҳо ба табодули молу маҳсулот, балки ба рушди сайёҳӣ, робитаҳои фарҳангӣ ва татбиқи барномаҳои муштарак дар солҳои минбаъда низ роҳ мекушояд.

Мирзонабот Алишер Худобердӣ зикр кард, ки маҳз ба шарофати сиёсати хирадмандонаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Президенти Ҷумҳурии Қирғизистон муҳтарам Садир Жапаров муносибатҳои ду кишвари дӯсту бародар дар солҳои охир қувват гирифта, барои рафтуомад, муоширати соҳибкорӣ ва рушди тамоми соҳаҳои хоҷагии халқ шароити мусоид фароҳам омадааст.

Аҳамияти ин сафар боз ҳам бештар дар он зоҳир шуд, ки ҳайати Тоҷикистон дар Фестивали байналмилалии сайёҳии «Салом Ош» низ иштирок ва суханронӣ намуд. Таъкид гардид, ки баргузории чунин фестивалу ҳамоишҳо на танҳо рушди бемайлони соҳаи сайёҳиро дастгирӣ мекунад, балки барои таҳкими эътимод, густариши муколамаи фарҳангӣ ва баланд бардоштани сатҳи ҳамкориҳо дар дигар соҳаҳо низ мусоидат менамояд.

Дар шароити афзоиши аҳамияти ҳамкориҳои марзӣ, чунин мулоқотҳо метавонанд ба ташаккули модели устувортари шарикии минтақавӣ замина гузоранд, ки дар он иқтисод, фарҳанг ва сайёҳӣ якдигарро тақвият медиҳанд.

АКС: Мақомоти иҷроияи ҳокимияти давлатии Вилояти Мухтори Кӯҳистони Бадахшони Тоҷикистон