Душанбе, 06 апрел, – АИ «Корвон Иттилоот». Дар шаҳри Москва 3 апрел ҷаласаи 109-уми Шӯрои иқтисодии Иттиҳоди Давлатҳои Мустақил баргузор гардид, ки самти таҳкими ҳамкориҳои иқтисодиро миёни кишварҳои узв дар шароити тағйирёбии вазъи минтақавӣ ва ҷаҳонӣ тасдиқ намуд.

Ҷаласа таҳти раёсати муовини якуми Сарвазири Ҷумҳурии Тоҷикистон Хоким Холикзода баргузор гардида, ин нақши фаъолонаи Тоҷикистонро дар доираи механизмҳои ҳамгироии минтақа нишон медиҳад. Тибқи иттилои АИ «Корвон Иттилоот, дар ҷараёни он зиёда аз 17 масъала баррасӣ гардида, қарорҳои дахлдор қабул шуданд.

Масъалаҳои баррасишуда соҳаҳои гуногуни ҳамкории иқтисодӣ ва иҷтимоиро дар бар гирифта, ба таҳкими робитаҳои тиҷоратӣ, ҳамоҳангсозии сиёсати иқтисодӣ ва густариши ҳамкории гуманитарӣ равона шудаанд.

Ҳамзамон, дар доираи ин чорабинӣ Форуми байналмилалии иқтисодии Иттиҳод баргузор гардид, ки дар ҷаласаи пленарии он ҳайати Тоҷикистон иштирок намуд. Ин форум ҳамчун майдони муҳими баррасии стратегияҳои рушди дарозмуддат ва ҷалби сармоя хизмат мекунад.

Коршиносон таъкид мекунанд, ки дар шароити имрӯза нақши Шӯрои иқтисодии ИДМ ҳамчун механизми ҳамоҳангсозии манфиатҳои кишварҳо бештар мегардад.

 Барои Тоҷикистон чунин иштирок имконият медиҳад, ки ташаббусҳои иқтисодии худро пешбарӣ намуда, робитаҳои сармоягузорӣ ва содиротиро густариш диҳад.

Ҷаласаи навбатии Шӯрои иқтисодии Иттиҳоди Давлатҳои Мустақил моҳи июни соли 2026 дар шаҳри Москва баргузор мегардад.

Акс: НИАТ «Ховар»