Душанбе, 12 июл, – АИ «Корвон Иттилоот». Изҳороти муовини якуми Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Исфандиёр Шукурзода дар бораи иҷрои садфоизаи нақшаи фурӯши иҷозатномаҳои шикори гӯсфанди Марко Поло (архар) дар мавсими шикори солҳои 2025–2026 аз самаранокии модели истифодаи устувори захираҳои табиии Тоҷикистон шаҳодат медиҳад.

Талаботи зиёд аз ҷониби шаҳрвандони хориҷӣ, ки тақрибан 70 фоизи иҷозатномаҳоро шикорчиёни Иёлоти Муттаҳидаи Амрико ва қисми боқимондаро шаҳрвандони Федератсияи Русия ва кишварҳои Аврупо харидорӣ намудаанд, мавқеи байналмилалии Помирро ҳамчун яке аз минтақаҳои бонуфузи сайёҳии шикорӣ тақвият медиҳад. Муқаррар гардидани арзиши иҷозатнома дар ҳаҷми тақрибан 52 ҳазор сомонӣ ҷалби шаффофи маблағҳои асъорӣ ба буҷети давлатии ҷумҳуриро таъмин менамояд.

Барои Тоҷикистон шикори танзимшавандаи ҳайвоноти нодири кӯҳӣ яке аз воситаҳои муассири ҳифзи олами ҳайвоноти ваҳшӣ ба ҳисоб меравад. Механизме, ки тибқи он қисми даромад аз фурӯши иҷозатномаҳо барои маблағгузории чорабиниҳои ҳифзи муҳити зист, дастгирии хоҷагиҳои шикорӣ ва мубориза бо шикори ғайриқонунӣ равона карда мешавад, самаранокии худро нишон додааст.

Тибқи маълумоти Иттиҳоди байналмилалии ҳифзи табиат (IUCN), шумораи гӯсфанди Марко Поло дар Тоҷикистон ба тақрибан 29 ҳазор сар расидааст, дар ҳоле ки ин нишондиҳанда соли 2018 тақрибан 26 ҳазор сарро ташкил медод. Ин омор нишон медиҳад, ки шикори маҳдуди наринаҳои синнашон калон ба афзоиши саршумори намуд таъсири манфӣ нарасонида, баръакс барои ҷомеаҳои маҳаллӣ ангезаҳои иқтисодӣ ҷиҳати ҳифзи ҳайвоноти нодир ва пешгирии шикори ғайриқонунӣ фароҳам меорад.

Дар заминаи байналмилалии экологӣ ва сайёҳӣ таҷрибаи Тоҷикистон ҳамчун намунаи муваффақи идоракунии танзимшавандаи сайёҳии экологӣ ва шикорӣ дар минтақаҳои баландкӯҳ арзёбӣ мегардад. Иштироки шикорчиён аз Иёлоти Муттаҳидаи Амрико ва кишварҳои Аврупо дар доираи қонунгузории Тоҷикистон ба таҳкими обрӯи кишвар ҳамчун макони амн ва дорои низоми самараноки назорати экологӣ мусоидат менамояд.

Ҳамзамон, ин раванд барои рушди инфрасохтори Вилояти Мухтори Кӯҳистони Бадахшон, таъсиси ҷойҳои нави корӣ барои роҳбаладон, нозирони хоҷагиҳои шикорӣ ва соҳибони меҳмонхонаҳои хурд дар ноҳияҳои дурдасти кӯҳӣ низ замина фароҳам меорад.

Иҷрои пурраи нақшаи фурӯши иҷозатномаҳо натиҷаи назарраси иқтисодӣ мебошад. Бо вуҷуди ин, барои Кумитаи ҳифзи муҳити зист муҳим аст, ки ҳангоми муайян намудани меъёрҳои шикор тавозуни манфиатҳои иқтисодӣ ва талаботи илмиро нигоҳ дорад.

Танҳо дар асоси мониторинги мунтазами илмии саршумори ҳайвоноти ваҳшӣ ва риояи принсипҳои истифодаи устувори захираҳои табиӣ метавон мавқеи Тоҷикистонро ҳамчун яке аз кишварҳои пешсаф дар идоракунии оқилонаи гуногунии биологӣ ҳифз ва таҳким бахшид.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон