Душанбе, 21 июл, – АИ «Корвон Иттилоот». Сокинони Тоҷикистон даъват карда мешаванд, ки дар рӯзҳои наздик эҳтиёткориро ҷиддан риоя намоянд. Тибқи маълумоти Агентии обуҳавошиносии Ҷумҳурии Тоҷикистон, рӯзҳои 21 ва 22 июл дар як қатор ноҳияҳои кишвар шиддат гирифтани шамоли ғарбӣ бо суръати 13–18 метр дар як сония, дар баъзе минтақаҳо бо вазиши шамол то 20–25 метр дар як сония дар назар аст.

Интизор меравад, ки шамоли сахт бо тӯфони чангу ғубор ва тирашавии ҳаво ҳамроҳ гардида, сатҳи намоёнро дар роҳҳои автомобилгард, махсусан дар минтақаҳои кушод ва доманакӯҳӣ, ба таври назаррас коҳиш диҳад. Ба ронандагон тавсия дода мешавад, ки қоидаҳои ҳаракатро қатъиян риоя намуда, суръати воситаҳои нақлиётро коҳиш диҳанд ва ҳангоми бад шудани вазъи обу ҳаво аз сафарҳои нолозим худдорӣ намоянд.

Бино ба иттилои ҳавошиносон, 21 июл дар баъзе ноҳияҳои кӯҳӣ инчунин боронҳои шадид пешгӯӣ мешаванд.

Дар робита ба боришоти пуршиддат, аз 21 то 23 июл дар ноҳияҳои кӯҳӣ ва доманакӯҳии тобеи ҷумҳурӣ, вилояти Хатлон, ноҳияҳои ғарбии Вилояти Мухтори Кӯҳистони Бадахшон, инчунин дар ноҳияи Айнӣ ва шаҳри Панҷакент хатари омадани селҳои маҳаллӣ боқӣ мемонад.

Мутахассисон ҳамчунин аз бад шудани сифати ҳавои атмосфера бар асари зиёд гардидани консентратсияи зарраҳои майдаи PM10 ва PM2.5 ҳушдор медиҳанд. Ин ҳолат 23 июл дар шаҳри Душанбе, ноҳияҳои тобеи ҷумҳурӣ ва вилояти Хатлон, инчунин рӯзҳои 22 ва 23 июл дар Вилояти Мухтори Кӯҳистони Бадахшон пешбинӣ мешавад.

Дар ин замина ба шаҳрвандон тавсия дода мешавад, ки, бахусус кӯдакон, пиронсолон ва шахсони гирифтори бемориҳои роҳҳои нафас ва дилу рагҳо, вақти будубоши худро дар ҳавои кушод маҳдуд намоянд.

Ҳамчунин сокинон даъват карда мешаванд, ки дар давраи амали огоҳӣ аз сафар ба ноҳияҳои кӯҳӣ худдорӣ намуда, пайваста иттилооти расмии мақомоти масъулро пайгирӣ ва талаботи бехатариро дар роҳҳо ва минтақаҳои эҳтимолии ҳолатҳои фавқулода риоя намоянд.

Акс: Агентии обуҳавошиносии Ҷумҳурии Тоҷикистон/ Азия+