Душанбе, 14 ноябр, – АИ «Корвон Иттилоот». Дар пойтахти Ҷумҳурии Тоҷикистон — шаҳри Душанбе — 13 ноябр чорабиниҳои ҷаласаи мавсими тирамоҳии Ассамблеяи байнипарлумонии давлатҳои иштирокдори Иттиҳоди Давлатҳои Мустақил (ИДМ) оғоз гардиданд.

Дар ҷаласаҳо роҳбарон ва ҳайатҳои парлумонии Тоҷикистон, Россия, Озарбойҷон, Арманистон, Беларус, Узбекистон, Қирғизистон ва Қазоқистон ширкат доранд.

13 ноябр ҷаласаи Шӯрои Ассамблеяи байнипарлумонии ИДМ баргузор мегардад, ки дар он роҳбарони парлумонҳои кишварҳои Иттиҳод иштирок мекунанд. Дар ҷараёни он вакилони мардумӣ иттилоот оид ба қарорҳои Шӯрои сарони давлатҳои ИДМ (10 октябри соли 2025) ва Шӯрои сарони ҳукуматҳои ИДМ (29 сентябри соли 2025)-ро баррасӣ мекунанд.

Дар рӯзномаи ҷаласа масъалаҳои марбут ба раёсати Ҷумҳурии Тоҷикистон дар ИДМ дар соли 2025, фаъолияти Комиссияи ҳуқуқи инсон, инчунин супоридани ҷоизаи ба номи Чингиз Айтматов баррасӣ мегарданд.

Ҳамчунин вакилони парлумонҳо нақшаи кори Ассамблеяро барои соли 2026 муҳокима намуда, натиҷаҳои фаъолиятҳои соли ҷорӣ ва дурнамои ҳамкориҳои байнипарлумониро арзёбӣ мекунанд.

Дар ҷараёни ҷаласа роҳбарон ва намояндагони парлумонҳои кишварҳои ИДМ ба масъалаҳои таҳкими ҳамкориҳои байнидавлатӣ, такмили заминаи қонунгузорӣ ва таъмини амнияти минтақавӣ таваҷҷуҳи хос зоҳир менамоянд.

Инчунин, форум ба мубодилаи таҷрибаи дипломатияи байнипарлумонӣ мусоидат намуда, барои таҳкими эътимод ва ваҳдати кишварҳои Иттиҳод саҳми арзанда мегузорад.

Корҳои ҷаласа бо баргузории 59-умин ҷаласаи умумии Ассамблеяи байнипарлумонии ИДМ, ки 14 ноябр доир мегардад, ҷамъбаст мешаванд.

Баргузории чунин ҳамоишҳо дар Душанбе нишон медиҳад, ки Тоҷикистон нақши муҳим дар рушди равандҳои ҳамгироӣ дар фазои ИДМ дошта, барои таҳкими гуфтугӯ ва ҳамкории судманд миёни кишварҳои минтақа саҳм мегузорад.

Акс: Маҷлиси милли Маҷлиси Олии Ҷумҳурии Тоҷикистон