Душанбе, 21 май, – АИ «Корвон Иттилоот». Дабири кулли Созмони амният ва ҳамкорӣ дар Аврупо (САҲА) Феридун Синирлиоғлу саҳми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмонро дар таҳкими суботи минтақавӣ баланд арзёбӣ намуд. Дар ин бора ӯ зимни брифинг дар пайи мулоқот бо Сарвари давлат изҳор дошт.

Феридун Синирлиоғлу таъкид кард, ки нахустин сафари расмии ӯ ба ҳайси Дабири кулли САҲА гувоҳи шарикии мустаҳкам ва пайгирона миёни созмон ва Тоҷикистон мебошад, ки беш аз се даҳсола идома дорад.

Ба гуфтаи ӯ, аз замони шомил шудан ба САҲА дар соли 1992 Тоҷикистон мавқеи фаъолро дар фаъолияти созмон ишғол мекунад ва ҳанӯз соли 1994 дар кишвар аввалин ҳузури саҳроии САҲА дар Осиёи Марказӣ ба кор оғоз намуд.

Дабири кулл таъкид намуд, ки фаъолияти САҲА ба авлавиятҳои муҳими Тоҷикистон, аз ҷумла масъалаҳои амният ва идоракунии марзҳо, рӯзномаи обию энергетикӣ, инчунин муқовимат ба таҳдидҳои фаромиллӣ зич пайванд дорад.

Ба таври махсус фаъолияти Коллеҷи сарҳадии САҲА барои ҳайати роҳбарикунанда дар Душанбе таъкид гардид, ки ба гуфтаи Феридун Синирлиоғлу, ба як платформаи пешбари минтақавии омӯзиши касбӣ, табодули таҷриба ва муколама табдил ёфтааст.

Дабири кулли САҲА ҳамчунин саҳми шахсии Президенти Ҷумҳурии Тоҷикистон муҳтарам Эмомалӣ Раҳмонро дар пешбурди созишномаи сарҳадии давлатӣ миёни Тоҷикистон ва Қирғизистон, ки моҳи марти соли 2025 ба имзо расид, инчунин Эъломияи Хуҷанд аз 31 марти соли 2025 байни Тоҷикистон, Қирғизистон ва Ӯзбекистон баланд арзёбӣ намуд.

«Ин дастовардҳо нишон медиҳанд, ки муколама, иродаи сиёсӣ ва ҳамкории сулҳомез метавонанд натиҷаҳои мушаххас ба бор оранд», — таъкид кард Феридун Синирлиоғлу.

Ба гуфтаи ӯ, дар шароити афзоиши танишҳо дар минтақаҳои гуногуни ҷаҳон, Осиёи Марказӣ имрӯз ба як намунаи умедбахши таҳкими эътимод, ҳамсоягии нек ва таъмини муштараки амният табдил ёфтааст.

Изҳороти Дабири кулли САҲА дар пасманзари густариши муколамаи минтақавӣ дар Осиёи Марказӣ ва таваҷҷуҳи рӯзафзуни созмонҳои байналмилалӣ ба масъалаҳои устуворӣ, амният ва ҳамкории обию энергетикӣ дар минтақа садо дод.

АКС: АМИТ «ХОВАР»