Душанбе, 08 май, – АИ «Корвон Иттилоот». Дар шаҳри Бохтар дар остонаи 81-умин солгарди Рӯзи Ғалаба ба собиқадори Ҷанги дуюми ҷаҳон Сафаралӣ Файзализода тӯҳфаи Президенти Тоҷикистон Эмомалӣ Раҳмон супурда шуд. Ин иқдом боз як намунаи анъанаест, ки дар Тоҷикистон на танҳо маънои рамзӣ, балки арзиши амиқи иҷтимоӣ ва ахлоқӣ дорад.
Тавре аз Мақомоти иҷроияи ҳокимияти давлатии вилояти Хатлон хабар доданд, дар ин дидор намояндаи Дастгоҳи иҷроияи Президенти Ҷумҳурии Тоҷикистон, раиси вилояти Хатлон, роҳбарони шаҳри Бохтар ва ноҳияи Кӯшониён иштирок карданд. Аз номи Пешвои миллат ба собиқадор кумаки молиявӣ ба маблағи 50 ҳазор сомонӣ ва аз номи раиси вилояти Хатлон боз 15 ҳазор сомонӣ, инчунин туҳфаҳои идона тақдим гардиданд.
Дар мулоқот таъкид шуд, ки собиқадорони Ҷанги дуюми ҷаҳон дар таъмини сулҳ ва озодӣ саҳми бузург гузоштаанд ва давлат ҳамеша ғамхорӣ нисбат ба онҳо ва эҳтироми хизматҳояшонро яке аз вазифаҳои муҳими сиёсати иҷтимоӣ мешуморад. Чунин дидорҳо дар остонаи Рӯзи Ғалаба на танҳо ифодаи эҳтиром, балки ёдоварии пайванди наслҳо, ҳофизаи таърихӣ ва масъулияти маънавӣ дар назди онҳое мебошад, ки рӯзгори ҷангро аз сар гузаронидаанд.
Худи собиқадор барои ғамхории доимӣ ва таваҷҷуҳи пайвастаи Сарвари давлат изҳори сипос намуда, гуфт, ки қадрдонии хизматҳои собиқадорон нишонаи эҳтиром ба таърих ва корномаи фарзандони Ватан аст.
Ба маълумоти мақомоти вилоят, ҳоло дар шаҳру ноҳияҳои вилояти Хатлон 5 собиқадори Ҷанги дуюми ҷаҳон зиндагӣ мекунанд. Ҳамасола дар остонаи Рӯзи Ғалаба онҳоро намояндагони давлат аёдат намуда, туҳфаҳо ва суханони сипосгузорӣ мерасонанд.
Қаблан роҳбарияти вилояти Суғд хабар дода буд, ки ба ҳар як собиқадори Ҷанги Бузурги Ватанӣ, ки дар ин минтақа ҳамагӣ 2 нафар боқӣ мондааст, 25 ҳазор сомонӣ ҷудо карда шудааст. Ҳамчунин ба ҳар як иштирокчии ақибгоҳ, ки шумораи онҳо 39 нафарро ташкил медиҳад, 10 ҳазор сомонӣ пардохт мегардад.
Ба ҳолати 30 апрели соли 2026 дар Тоҷикистон 8 собиқадори Ҷанги Бузурги Ватанӣ зиндагӣ мекунанд. Рӯзи 30 апрел собиқадори ҶБВ аз ноҳияи Хуросон Мирзо Ғафуров даргузашт. Пеш аз ин, 27 апрел Раҷаб Исмонов — охирин собиқадори ҶБВ аз Ҳисор аз олам чашм пӯшид.
Акс: Мақомоти иҷроияи ҳокимияти давлатии вилояти Хатлон.