Душанбе, 23 май, – АИ «Корвон Иттилоот». 22 май дар Донишгоҳи славянии Русияву Тоҷикистон конфронси байналмилалии илмиву амалӣ таҳти унвони «Россия — Тоҷикистон: таърих ва замони муосир» баргузор гардид, ки ба 35-солагии Истиқлоли давлатии Ҷумҳурии Тоҷикистон ва 30-солагии ДСРТ бахшида шуд.
Ташкилкунандаи конфронс кафедраи таърихи умумиҷаҳонӣ ва ватанӣ дар назди факултети таърих ва муносибатҳои байналмилалии ДСРТ буд. Ҳамташкилкунанда кафедраи таърихи навини ватании Донишгоҳи давлатии Ярославл ба номи П.Г. Демидов ба шумор мерафт.
Ба иштирокчиёни ҳамоиш ноиби аввалини ректор, ноиби ректор оид ба илм ва инноватсия, доктори илмҳои ҳуқуқ, профессор Алексей Золотухин бо сухани ифтитоҳӣ муроҷиат намуд. Ҳамчунин муовини ноиби ректор оид ба корҳои илмии Донишгоҳи давлатии Ярославл ба номи П.Г. Демидов, номзади илмҳои биологӣ, дотсент Екатерина Флёрова тариқи паёми видеоӣ иштирокчиёнро хайрамақдам гуфт.
Ҷаласаи пленарӣ таҳти раёсати мудири кафедраи таърихи умумиҷаҳонӣ ва ватании ДСРТ, доктори илмҳои таърих, дотсент Мунир Пирумшоев баргузор гардид. Дар ҷараёни он маърӯзаҳо вобаста ба асосҳои таърихии муносибатҳои Тоҷикистону Русия, равандҳои муосири муҳоҷират, сиёсати Русия дар Осиёи Марказӣ, инчунин ҳамкории ду кишвар дар соҳаи мудофиа ва амният пешниҳод шуданд.
Аз ҷумла, дар баромадҳои пленарӣ ба мавзӯъҳои «Дӯстии имтиҳоншудаи замон», «Муҳоҷирати тоҷикон ба Русия дар асри XXI: ҷанбаи занона», «Сиёсати Русия дар Осиёи Марказӣ дар шароити тағйироти геополитикӣ: самти Тоҷикистон», инчунин масъалаҳои ҳамкории ҳарбию сиёсӣ таваҷҷуҳи махсус зоҳир гардид.
Пас аз қисми пленарӣ кори конфронс дар ду сексия идома ёфт.
Сексияи аввал ба ҳамкориҳои ҳарбию сиёсӣ ва иқтисодии Русия ва Тоҷикистон бахшида шуда буд. Иштирокчиён нақши СААД-ро дар таъмини амнияти марзҳои ҷанубии ИДМ, иштироки Русия дар рӯйдодҳои ҷанги шаҳрвандии Тоҷикистон дар солҳои 1992–1997, робитаҳои муҳоҷиратӣ, таърихи ҳамкории марзӣ, рушди саноати ангишт ва конҳои нафт, инчунин ҳамкории ду давлат дар соҳаи маорифро баррасӣ карданд.
Сексияи дуюм ба муносибатҳои Русия ва Тоҷикистон дар соҳаи фарҳангиву башардӯстона бахшида шуда буд. Дар ҷараёни муҳокима масъалаҳои саҳми олимони рус ва шӯравӣ дар омӯзиши таърих ва фарҳанги Тоҷикистон, рушди театри тоҷик, санъати кино ва мусиқии академӣ, таҳқиқоти бостоншиносӣ, фаъолияти Маркази русии илм ва фарҳанг дар Тоҷикистон, инчунин ҳифзи хотираи Ҷанги Бузурги Ватанӣ мавриди баррасӣ қарор гирифтанд.
Дар конфронс олимон, омӯзгорон, муҳаққиқон ва намояндагони муассисаҳои илмии Тоҷикистону Федератсияи Россия, аз ҷумла мутахассисони ДСРТ, Донишгоҳи давлатии Ярославл ба номи П.Г. Демидов, Академияи миллии илмҳои Тоҷикистон, Донишгоҳи давлатии Хоруғ, Донишгоҳи миллии Тоҷикистон, Донишгоҳи давлатии омӯзгории Тоҷикистон ба номи С. Айнӣ ва дигар муассисаҳои илмиву таълимӣ иштирок намуданд.
Баргузории конфронс ба як майдони муҳими муколамаи илмӣ, мубодилаи таҷрибаи таҳқиқотӣ ва баррасии масъалаҳои мубрами таърих, сиёсат, иқтисод, маориф ва фарҳанг дар заминаи ҳамкории Тоҷикистону Русия табдил ёфт.
Дар анҷоми кори ҳамоиш иштирокчиён аҳамияти идомаи омӯзиши робитаҳои таърихии Тоҷикистону Русия, таҳкими ҳамкории илмӣ миёни донишгоҳҳо ва рушди лоиҳаҳои муштараки таҳқиқотиро таъкид карданд.
АКС: Донишгоҳи славянии Русияву Тоҷикистон