Душанбе, 10 июн, – АИ «Корвон Иттилоот». Аз 25 июн то 2 июли соли 2026 дар пойтахти Тоҷикистон — шаҳри Душанбе — ҷаласаи 45-уми Шӯрои мудирони Хазинаи сабзи иқлим (Green Climate Fund, GCF) баргузор мегардад.

Масъалаҳои омодагӣ ба ин чорабинии муҳими байналмилалӣ дар ҷаласаи Кумитаи тадорукот, ки дар Душанбе таҳти роҳбарии муовини Сарвазири кишвар, раиси кумитаи тадорукот Сулеймон Зиёзода баргузор шуд, баррасӣ гардиданд.

Таъкид гардид, ки ҷаласаи 45-уми Шӯрои мудирони Хазинаи сабзи иқлим як чорабинии бонуфузи байналмилалӣ мебошад, ки дар он намояндагони кишварҳои узви фонд, созмонҳои байналмилалӣ, ниҳодҳои молиявӣ ва коршиносони соҳаи иқлим ширкат хоҳанд кард. Дар ҷараёни ҷаласа масъалаҳои калидии марбут ба маблағгузории иқлимӣ, татбиқи лоиҳаҳои рушди устувор ва таҳкими ҳамкории байналмилалӣ дар самти муқовимат ба тағйирёбии иқлим баррасӣ мешаванд.

Бояд таъкид кард, ки баргузории ҷаласаи 45-уми Шӯрои мудирони Хазинаи сабзи иқлим дар Тоҷикистон нишонаи эътимоди баланди ҷомеаи ҷаҳонӣ ба ташаббусҳои глобалии Ҷумҳурии Тоҷикистон дар самти ҳифзи муҳити зист ва пешбурди рӯзномаи байналмилалии иқлимӣ арзёбӣ мегардад. Ин рӯйдод ҳамчунин барои густариши ҳамкорӣ бо шарикони рушд ва ҷалби сармоягузориҳои «сабз» шароити мусоид фароҳам меорад.

Ёдовар мешавем, ки Тоҷикистон дар арсаи байналмилалӣ ҳамчун яке аз кишварҳои пешсаф дар пешбурди рӯзномаи обу иқлим ва масъалаҳои ҳифзи пиряхҳо шинохта шудааст ва ташаббусҳои он ҳамеша аз ҷониби ҷомеаи ҷаҳонӣ пуштибонӣ меёбанд.

Хазинаи сабзи иқлим бузургтарин фонди байналмилалӣ дар ҷаҳон ба ҳисоб меравад, ки аз ҷониби Созмони Милали Муттаҳид бо мақсади кӯмак ба кишварҳои рӯ ба рушд дар мубориза бо тағйирёбии иқлим таъсис ёфтааст. Он лоиҳаҳои бузургмиқёсро барои гузариш ба иқтисоди камкарбон ва мутобиқшавӣ ба тағйироти глобалии иқлим маблағгузорӣ мекунад.

Фонд соли 2010 дар доираи Конвенсияи чорчӯбаи СММ оид ба тағйирёбии иқлим ва Созишномаи Париж таъсис дода шудааст.

Қароргоҳии Хазинаи сабзи иқлим дар ноҳияи тиҷоратии Сонгдо-и шаҳри Инчони Ҷумҳурии Корея ҷойгир аст. Идоракунии фонд тавассути Шӯрои мудирон, ки аз 24 аъзо иборат аст, бо дастгирии Котибот амалӣ мешавад.

Директори иҷроияи Хазинаи сабзи иқлим Мафалда Дуарте, шаҳрванди Португалия мебошад.

Сандуқи қарзии  фонд аз 20 миллиард доллари ИМА бештар буда, зиёда аз 300 лоиҳаро дар бар мегирад. Бо дарназардошти ҳаммаблағгузорӣ, ҳаҷми умумии сармоягузорӣ ба даҳҳо миллиард доллар мерасад.

Фаъолияти фонд ба маблағгузории лоиҳаҳо оид ба коҳиши партови газҳои гулхонаӣ, аз ҷумла рушди энергетикаи барқароршаванда, мутобиқшавӣ ба тағйирёбии иқлим, инчунин дастгирии кишварҳое, ки аз хушксолӣ, обхезӣ, болоравии сатҳи баҳр ва обшавии пиряхҳо зарар дидаанд, равона шудааст.

АКС: АМИТ «Ховар»