Душанбе, 12 декабр, 2025г. – АИ «Корвон Иттилоот». Дар пойтахти кишвар 10 декабр  39-умин ҷаласаи Кумитаи машваратии роҳбарони хадамоти ҳуқуқии вазоратҳои корҳои хориҷии давлатҳои узви ИДМ баргузор гардид. Ҷаласа 9 декабр дар доираи раёсати Ҷумҳурии Тоҷикистон дар ИДМ доир шуд.

Тибқи иттилои Вазорати корҳои хориҷии Тоҷикистон, дар ҷаласа намояндагони хадамоти ҳуқуқии ВКХ-и Беларус, Қазоқистон, Қирғизистон, Русия, Тоҷикистон ва Ӯзбекистон, ҳамчунин намояндагони департаменти ҳуқуқии Кумитаи иҷроияи ИДМ иштирок доштанд.

Дар ҷараёни мулоқот масъалаҳои ҳамкории байналмилалӣ-ҳуқуқӣ ва таҷрибаи татбиқи меъёрҳои ҳуқуқӣ дар доираи ИДМ мавриди баррасӣ қарор гирифт.

Зикр шуд, ки таҳкими заминаҳои ҳуқуқии ҳамкорӣ дар доираи ИДМ ба эҷоди муҳити устувор ва пешгӯишавандаи ҳамгироӣ дар минтақа мусоидат мекунад. Ҳамчунин зарурати ҳамоҳангсозии мавқеи кишварҳо ва такмили заминаи меъёрӣ таъкид гардид.

Бо назардошти он ки ҷаласа дар остонаи Рӯзи байналмилаии ҳуқуқи инсон баргузор шуд, иштирокчиён аз қабули қатъномаи «Манифести Кира: оини ибтидоии ҳуқуқи инсон ва гуногунрангии фарҳангӣ», ки бо ташаббуси Тоҷикистон 6 ноябри 2025 дар ҷаласаи 43-юми Конфронси генералии ЮНЕСКО қабул гардид, огоҳ карда шуданд.

Таъкид гардид, ки «Манифести Кира» яке аз нахустин санадҳои башардӯстона мебошад, ки арзишҳои озодии виҷдон, эҳтироми гуногунрангии фарҳангӣ ва ҳамзистии осоиштаро тарғиб мекунад. Ин ҳуҷҷат аҳамияти таърихӣ ва маънавӣ дошта, ба ташкили модели идоракунӣ такя мекунад, ки ба арзишҳои асрҳо ҷамъшуда асос ёфтааст.

Ҷаласаи мазкур қадами муҳими дигаре дар таҳкими ҳамкорӣ ва ҳамоҳангсозии ҳуқуқии кишварҳои ИДМ гардида, нақши Тоҷикистонро дар пешбурди ташаббусҳои башардӯстона дар сатҳи байналмилалӣ муаррифӣ намуд.

АКС: Вазорати корҳои хориҷии Тоҷикистон