Душанбе, 10 июн, – АИ «Корвон Иттилоот». Дар пойтахти Тоҷикистон 9 июн ба бунёди маҷмааи муосири IT Hub Dushanbe оғоз бахшида шуд, ки дар оянда ба яке аз марказҳои калидии рушди иқтисоди рақамӣ, технологияҳои инноватсионӣ ва таҳияи қарорҳои пешрафтаи технологӣ табдил хоҳад ёфт.

Маросими гузоштани санги асоси иншооти нав дар ноҳияи Исмоили Сомонии шаҳри Душанбе бо иштироки Раиси шаҳри Душанбе Рустами Эмомалӣ баргузор гардид.

Тибқи лоиҳа, маҷмааи нав як қатор сохторҳои муҳими соҳаро муттаҳид хоҳад кард. Аз ҷумла, дар ҳудуди он мактаби IT, IT-парк, маркази соҳибкории технологияҳои иттилоотӣ ва Маркази минтақавии зеҳни сунъӣ фаъолият хоҳанд намуд. Интизор меравад, ки ин маҷмаа ба майдони асосии омодасозии мутахассисони баландихтисос, дастгирии стартапҳо, рушди соҳибкории инноватсионӣ ва татбиқи технологияҳои муосир табдил ёбад.

Таъсиси IT Hub Dushanbe идомаи мантиқии сиёсати давлат дар самти рақамикунонии иқтисод ва густариши истифодаи технологияҳои иттилоотию коммуникатсионӣ мебошад. Солҳои охир дар Тоҷикистон барои рушди хизматрасониҳои электронӣ, таҳкими инфрасохтори рақамӣ ва омодасозии мутахассисони соҳаи технологияҳои нав тадбирҳои пайваста амалӣ мегарданд.

Аҳамияти лоиҳа махсусан дар заминаи қабули Стратегияи рушди соҳаи алоқа то соли 2040 бештар мегардад. Ин стратегия рушди инфрасохтори рақамӣ, таъсиси марказҳои коркарди маълумот, ҷорӣ намудани технологияҳои зеҳни сунъӣ ва баланд бардоштани сатҳи саводнокии рақамии аҳолиро пешбинӣ мекунад. IT Hub Dushanbe метавонад ба яке аз механизмҳои муҳими татбиқи ин ҳадафҳо табдил ёбад.

Ба андешаи коршиносон, таъсиси чунин марказҳои технологӣ на танҳо барои рушди муҳити инноватсионӣ замина фароҳам меорад, балки ҷалби сармоягузорӣ, рушди тиҷорати баландтехнологӣ ва таъсиси ҷойҳои нави кориро низ таъмин менамояд. Ин омил махсусан барои ҷавононе, ки ба соҳаи технологияҳои рақамӣ таваҷҷуҳ доранд, имкониятҳои нав фароҳам хоҳад овард.

Маркази минтақавии зеҳни сунъӣ, ки дар таркиби маҷмаа фаъолият хоҳад кард, метавонад ба платформаи муҳими таҳқиқоти илмӣ, таҳияи маҳсулоти рақамӣ ва мубодилаи таҷриба миёни мутахассисони кишварҳои Осиёи Марказӣ табдил ёбад. Ин иқдом имкониятҳои нави ҳамкории минтақавиро фароҳам оварда, мавқеи Душанберо ҳамчун яке аз марказҳои рӯ ба рушди технологияҳои муосир дар минтақа таҳким мебахшад.

Татбиқи лоиҳаи IT Hub Dushanbe ба тавсеаи истифодаи технологияҳои нав дар бахшҳои гуногуни иқтисод, ташаккули ҷомеаи иттилоотӣ ва баланд бардоштани рақобатпазирии иқтисоди миллӣ дар шароити рақамикунонии ҷаҳонӣ мусоидат хоҳад кард.

Акс: Хадамоти матбуоти Мақомоти иҷроияи ҳокимияти давлатии шаҳри Душанбе.