Душанбе, 10 ноябр, – АИ «Корвон Иттилоот». Дар Театри давлатии академии опера ва балети ба номи Садриддин Айнӣ 09 ноябр ба муносибати Рӯзи милитсияи тоҷик чорабинии тантанавӣ баргузор шуд. Дар он намояндагони мақомоти давлатӣ ва ҳифзи ҳуқуқ, роҳбарону кормандони милитсияи пойтахт, собиқадорон ва фаъолони ҷомеа иштирок карданд.

Дар чорабинӣ муовини якуми раиси шаҳри Душанбе, муовини вазири корҳои дохилии Тоҷикистон, сардори Раёсати ВКД дар шаҳри Душанбе, роҳбарони раёсатҳои Вазорати корҳои дохилӣ ва мақомоти ҳифзи ҳуқуқи пойтахт ҳузур доштанд. Ҳамчунин сардорон ва кормандони ҷузъу томҳои милитсияи шаҳр, собиқадорони мақомоти милитсия ва намояндагони ҷомеа ба чорабинӣ даъват шуда буданд.

Зимни суханрониҳо аз таърихи ташаккул ва роҳи пуршарафи милитсияи тоҷик ёдовар шуданд. Иштирокчиён саҳми кормандони мақомоти корҳои дохилиро дар таъмини тартиботи ҷамъиятӣ, ҳифзи ҳуқуқу озодиҳои шаҳрвандон, мубориза бо ҷинояткорӣ ва таҳкими суботу амнияти ҷомеа таъкид карданд.

Сардори Раёсати ВКД дар шаҳри Душанбе, генерал-майори милитсия Шоҳрух Саидзода, изҳор дошт, ки кормандони мақомоти милитсия ба савганди худ содиқ монда, ба халқу Ватан хизмат мекунанд.

«Мо, кормандони мақомоти милитсия, бо садоқатмандӣ ба савганди худ, баҳри ҳифзи ҳуқуқу манфиатҳои қонунии шаҳрвандон, таъмини суботу оромӣ ва амнияти ҷомеа ҳамеша ба халқу Ватани азизамон содиқона хизмат менамоем», — гуфт ӯ.

Дар бахши фарҳангии чорабинӣ ҳунармандони маъруф ва намояндагони ансамбли Раёсати Вазорати корҳои дохилии Ҷумҳурии Беларус дар шаҳри Минск барномаи фарҳангиву фароғатӣ пешкаши ҳозирин карданд.

Чорабинӣ ба гиромидошти таърихи милитсия ва қадрдонии хизмат дар ҳифзи тартибот ва амнияти ҷомеа бахшида шуда буд.

Акс: Раёсати ВКД дар шаҳри Душанбе