Душанбе, 09 май, – АИ «Корвон Иттилоот». 7 майи соли 2026 дар заминаи Донишкадаи байналмилалии Хуҷанд назди Донишгоҳи байналмилалии сайёҳӣ ва соҳибкории Тоҷикистон маросими расмии ифтитоҳи маркази фарҳангию таълимии «Фазои русӣ» баргузор гардид.

Лоиҳа бо дастгирии ҳамоҳангсозии Донишгоҳи славянии Русияву Тоҷикистон амалӣ шуда, ба 81-солагии Ғалаба дар Ҷанги Бузурги Ватанӣ бахшида шуд. Ифтитоҳи марказ ҳамчун як рӯйдоди муҳим дар рушди ҳамкориҳои гуманитарӣ ва таълимии Тоҷикистон ва Федератсияи Русия арзёбӣ мегардад.

Дар маросими тантанавӣ Сафири Фавқулода ва Мухтори Федератсияи Русия дар Тоҷикистон Семён Григорев, ректори ДБХ назди ДБССТ, профессор Масрур Саидзода, консули генералии Русия дар шаҳри Хуҷанд Сергей Ланкин, роҳбари Хонаи Русия дар Хуҷанд Татяна Степанова, инчунин ҳайати Донишгоҳи славянии Русияву Тоҷикистон иштирок намуданд.

Маросими ифтитоҳ бо буридани лентаи сурх оғоз ёфт, ки онро Сафири Русия Семён Григорев ва роҳбари «Фазои русӣ» назди ДСРТ ва шабакаи «Фазоҳои русӣ» дар Тоҷикистон Радмила Холназарова анҷом доданд. Ин лаҳза оғози расмии фаъолияти як майдони нави таълимӣ, илмӣ ва фарҳангӣ гардид.

Дар суханронии худ Радмила Холназарова аҳамияти густариши шабакаи «Фазоҳои русӣ»-ро барои таҳкими робитаҳои фарҳангӣ, таълимӣ ва илмӣ, инчунин рушди муколамаи байнифарҳангӣ ва пешбурди забони русӣ дар Тоҷикистон таъкид намуд.

Дар доираи чорабинӣ миёни Донишгоҳи славянии Русияву Тоҷикистон ва Донишкадаи байналмилалии Хуҷанд созишномаи ҳамкорӣ ба имзо расид. Ин санад ба рушди ҳамкориҳои таълимӣ, илмӣ ва фарҳангӣ, инчунин татбиқи лоиҳаҳои муштараки гуманитарӣ равона шудааст.

Дар суханрониҳои худ Семён Григорев ва Масрур Саидзода аҳамияти таҳкими ҳамкориҳои гуманитарӣ ва таъсиси платформаҳои муосир барои омӯзиши забон, фарҳанг ва илмро таъкид карданд.

Донишҷӯёни донишкада барномаҳои эҷодӣ пешниҳод намуда, ба меҳмонон ва ташкилкунандагони лоиҳа изҳори сипос карданд.

Роҳбари «Фазои русӣ» дар Хуҷанд Малохат Ҳасанова таъин гардид.

Ба гуфтаи Радмила Холназарова, маркази Хуҷанд ҳафтумин узви шабакаи «Фазоҳои русӣ» дар Тоҷикистон мебошад. Ӯ таъкид кард, ки ҳадафи асосии лоиҳа пешбурди забони русӣ, фарҳанг, таҳсилот ва илм, инчунин фароҳам овардани майдони ягона барои ҳамкории таълимӣ ва байнифарҳангӣ мебошад.

Айни замон «Фазоҳои русӣ» дар як қатор шаҳру минтақаҳои Тоҷикистон, аз ҷумла Душанбе, Бохтар, Левакант, Кӯлоб, Рашт, Хоруғ ва Хуҷанд фаъолият доранд.

Дар анҷоми чорабинӣ ба меҳмонони фахрӣ барои саҳмгузорӣ дар рушди ҳамкориҳои гуманитарӣ ва таълимӣ сипосномаҳо ва туҳфаҳои хотиравӣ тақдим гардид.

Ифтитоҳи марказ дар Хуҷанд як қадами навбатӣ дар таҳкими робитаҳои фарҳангӣ ва таълимӣ буда, имкониятҳои нави омӯзиши забони русӣ ва шиносоии ҷавонон бо мероси илмӣ ва фарҳангиро фароҳам меорад.

АКС: Хонаи Русия дар Хуҷанд