Душанбе, 09 июл, – АИ «Корвон Иттилоот». Тоҷикистон марҳилаи нави навсозии низоми маорифро оғоз менамояд, ки ба омода намудани хонандагон барои зиндагӣ ва фаъолияти касбӣ дар шароити иқтисоди рақамӣ равона шудааст.

Вазорати маориф ва илми Ҷумҳурии Тоҷикистон ва ширкати zypl.ai оид ба рушди зеҳни сунъӣ дар соҳаи маориф Ёддошти ҳамкорӣ ба имзо расониданд.

Санад 7 июл зимни мулоқоти муовини якуми вазири маориф ва илм Ҳомид Ҳошимзода бо намояндагони ширкат ба имзо расид. Ҷонибҳо масъалаҳои ворид намудани асосҳои зеҳни сунъӣ ба низоми таҳсилоти умумӣ, таҳияи барномаҳои таълимӣ, китобҳои дарсӣ, дастурҳои методӣ, омода намудани омӯзгорон ва ташаккули фарҳанги истифодаи масъулонаи технологияҳои рақамиро баррасӣ намуданд.

Дар доираи ҳамкорӣ таҳияи барномаи намунавии таълимӣ аз фанни зеҳни сунъӣ, китобҳои дарсӣ, дафтарҳои машқ, тавсияҳои методӣ, маводи рақамии таълимӣ ва меъёрҳои баҳодиҳии дониш пешбинӣ шудааст. Ҳамзамон барои омӯзгорон ва хонандагон курсҳои омӯзишӣ, омодасозии тренерон, таҳияи нақшаҳои таълимӣ ва таъмини методии раванди таълим амалӣ мегардад.

Дар Вазорати маориф ва илм таъкид карданд, ки тамоми маводи таълимӣ бояд бо забони давлатӣ омода шуда, бо мисолҳои соддаву фаҳмо ва ба ҳаёти ҳаррӯзаи хонандагони тоҷик мутобиқ гардонида шавад.

Қисми муҳими ташаббус таъмини муҳити амни рақамӣ мебошад. Барнома масъалаҳои ҳифзи ҳуқуқи кӯдакон, амнияти иттилоотӣ, ҳифзи маълумоти шахсӣ, риояи ҳуқуқи муаллиф, шаффофияти истифодаи технологияҳо ва татбиқи масъулонаи зеҳни сунъиро дар муҳити таълим фаро мегирад.

Ҷорӣ намудани омӯзиши асосҳои зеҳни сунъӣ ҳамчун қадами муҳими рушди сармояи инсонӣ ва баланд бардоштани саводнокии рақамии насли нав арзёбӣ мешавад. Ин иқдом ба омода намудани мутахассисони оянда барои иқтисоди рақамӣ ва рушди бахшҳои инноватсионии кишвар мусоидат хоҳад кард.

Акс: Вазорати маориф ва илми Ҷумҳурии Тоҷикистон