Душанбе, 31 март, – АИ «Корвон Иттилоот». 2–9 апрел — Дар Тоҷикистон фестивали ҷумҳуриявии «Ҳафтаи китоби кӯдакон ва наврасон» баргузор мегардад. Тавре аз Вазорати фарҳанги Ҷумҳурии Тоҷикистон хабар доданд, ин чорабинӣ таҳти шиори «Фурӯғи маърифат» доир шуда, тамоми шаҳру ноҳияҳои кишварро фаро мегирад.

Фестивал ба Рӯзи байналмилалии китоби кӯдакон, ки 2 апрел таҷлил мешавад, бахшида шуда, ба таҳкими завқи китобхонӣ, адабиётдӯстӣ ва рушди эҷодии насли наврас равона шудааст. Дар он иштирок ва ҳамкории адибон, олимон ва коршиносон пешбинӣ гардида, ба чорабинӣ мазмуни ҳам фарҳангӣ ва ҳам маърифатӣ мебахшад.

Барномаи ҳафта пурмуҳтаво хоҳад буд. Барои кӯдакон ва наврасон намоишҳои корҳои эҷодӣ, ярмарка-фурӯши китобҳои нав, рӯзномаву маҷаллаҳо, инчунин вохӯриҳои хонандагони наврас бо адибон баргузор мегарданд. Ҳамзамон ба тамошобинон маводҳои аксӣ аз фестивалҳои қаблӣ, порчаҳо аз намоишномаҳои Театри давлатии ҷумҳуриявии лӯхтак, инчунин баромадҳои Сирки давлатӣ пешкаш карда мешаванд.

Ҳафтаи китоб дар ин шакл на танҳо як силсила чорабиниҳои фарҳангӣ, балки як минбари муҳим барои ташаккули муҳити китобхонӣ, дастгирии эҷодиёти кӯдакон ва тарғиби арзишҳои маънавӣ миёни ҷавонон ба шумор меравад.

АКС: АМИТ «Ховар»