Душанбе, 21 май, – АИ «Корвон Иттилоот». Кумитаи кор бо занон ва оилаи назди Ҳукумати Ҷумҳурии Тоҷикистон дар доираи иҷрои Нақшаи чорабиниҳои Стратегияи миллии фаъолгардонии нақши занон озмуни пешниҳоди грантҳоро барои ташкилотҳои ҷомеаи шаҳрвандӣ дар соли 2026 эълон кард.

Тавре аз кумита хабар медиҳанд, ин иқдом ба татбиқи тавсияҳои сохторҳои дахлдори Созмони Милали Муттаҳид вобаста ба таъмини ҳуқуқу озодиҳои занон ва таҳкими баробарии гендерӣ равона шудааст. Яъне, сухан танҳо дар бораи дастгирии лоиҳаҳои ҷудогона нест, балки дар бораи талоши мақсаднок барои тақвияти нақши зан дар ҷомеа меравад — аз ҳифзи ҳуқуқ то васеъ кардани имкониятҳои иқтисодӣ ва иҷтимоӣ.

Озмун дар як қатор самтҳои афзалиятнок баргузор мешавад. Аз ҷумла, дар маркази таваҷҷуҳ пешгирии зӯроварии гендерӣ ва зӯроварӣ дар оила, густариши имкониятҳои иқтисодии занон, таъмини дастрасӣ ба адолати судӣ, таҳкими иқтидори роҳбарии занону духтарон, дастгирии гурӯҳҳои осебпазир ва беҳбуди дастрасӣ ба хизматрасониҳои тандурустӣ қарор дорад.

Ба озмун танҳо ташкилотҳои ҷамъиятӣ ва ҷомеаи шаҳрвандӣ роҳ дода мешаванд, ки тибқи тартиби муқарраргардида ба қайд гирифта шудаанд. Барои татбиқи лоиҳаҳо ба 5 ташкилоти ҷамъиятӣ грантҳо ба маблағи 11 ҳазор сомонӣ барои ҳар яки онҳо ҷудо карда мешавад.

Муҳлати пешниҳоди дархостҳо то 10 июни соли 2026 муайян шудааст.

Дар кумита таъкид мекунанд, ки чунин грантҳо метавонанд ба ташаккули ташаббусҳои амалӣ мусоидат кунанд ва дар сатҳи маҳаллӣ фазои бештар мусоид барои ҳифзи ҳуқуқи занон, тавсеаи имкониятҳои онҳо ва рушди иштироки фаъоли шаҳрвандӣ фароҳам оваранд.

АКС: Кумитаи кор бо занон ва оилаи назди Ҳукумати Ҷумҳурии Тоҷикистон