Душанбе, 13 июл, – АИ «Корвон Иттилоот». 10 июли соли 2026 дар толори маҷлисгоҳи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар доираи лоиҳаи «Ташкил ва гузаронидани маъракаи иттилоотӣ-фаҳмондадиҳӣ оид ба масъалаҳои мубориза бар зидди нашъамандӣ, гардиши ғайриқонунии маводи мухаддир, пешгирии нашъамандӣ ва тарғиби тарзи ҳаёти солим», ки аз ҷониби Ташкилоти ҷамъиятии «Гендер ва тараққиёт» бо дастгирии техникии Барномаи рушди Созмони Милали Муттаҳид (UNDP) ва Агентии Ҷопон (JICA) оид ба ҳамкориҳои байналмилалӣ амалӣ карда шуд, мизи мудаввар баргузор гардид.

Дар кори мизи мудаввар шахсони масъули Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Маркази ташаккули тарзи ҳаёти солим, намояндагони вазорату идораҳо, муассисаҳои тандурустӣ ва таълимӣ, инчунин дигар ташкилотҳои манфиатдор иштирок намуданд.

Ба иштирокчиён намояндагони роҳбарияти Вазорат ва намояндагони ташкилотҳои шарик бо суханони ифтитоҳӣ муроҷиат намуда, дар суханрониҳои худ аҳамияти муттаҳид намудани кӯшишҳои мақомоти давлатӣ, мутахассисони муассисаҳои тандурустӣ ва таълимӣ, шарикони рушд аз созмонҳои байналмилалӣ ва ташкилотҳои ҷомеаи шаҳрвандиро ҷиҳати пешгирии паҳншавии нашъамандӣ, пешгирии вобастагӣ аз маводи мухаддир ва ташаккули тарзи ҳаёти солим дар байни аҳолӣ, махсусан ҷавонон, таъкид намуданд.

Дар ҷараёни чорабинӣ Ташкилоти ҷамъиятии «Гендер ва тараққиёт» натиҷаҳои татбиқи лоиҳаро, аз ҷумла натиҷаҳои маъракаҳои омӯзишии баргузоршуда миёни хонандагони синфҳои болоии муассисаҳои таҳсилоти миёнаи умумӣ ва волидони онҳо, донишҷӯён ва омӯзгорони муассисаҳои таҳсилоти олии касбӣ, кормандони соҳаи тандурустӣ, кормандони шабакаҳои дорухонаҳо ва дигар мутахассисон муаррифӣ намуд. Ҳамчунин иштирокчиён бо дастовардҳои асосии лоиҳа шинос гардида, оид ба самтҳои минбаъдаи фаъолият тавсияҳои худро пешниҳод намуданд.

Дар рафти муҳокимаҳо ба масъалаҳои баланд бардоштани самаранокии корҳои пешгирикунанда ва таҳкими ҳамкории байниидоравӣ миёни муассисаҳои тандурустӣ, маориф, мақомоти иҷроияи маҳаллии ҳокимияти давлатӣ ва ташкилотҳои ҷамъиятӣ таваҷҷуҳи махсус зоҳир карда шуд.

Аз рӯи натиҷаҳои мизи мудаввар иштирокчиён омодагии худро барои идомаи фаъолияти муштарак ҷиҳати татбиқи чорабиниҳои ҳамаҷонибаи пешгирикунанда, ки ба пешгирии истеъмоли маводи мухаддир, коҳиш додани хавфи вобастагӣ аз маводи мухаддир ва тарғиби тарзи ҳаёти солим дар байни аҳолӣ, махсусан ҷавонон, равона гардидаанд, тасдиқ намуданд.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон