Душанбе, 24 сентябр, – АИ «Корвон Иттилоот». Хонаи русӣ дар шаҳри Хуҷанд аз баргузории даври аввали фестивал-озмуни вилоятии «Суруди русӣ» хабар дод. Даври интихобӣ аз 1 то 30 октябри соли 2026 дар шаҳру ноҳияҳои вилояти Суғд баргузор мешавад.

Фестивал-озмун барои сарояндагоне пешбинӣ шудааст, ки мехоҳанд сурудҳои русзабонро иҷро намуда, маҳорати овозхонии худро ба намоиш гузоранд. Ба иштирок намояндагони се гурӯҳи синнусолӣ — аз 8 то 16-сола, аз 16 то 30-сола ва аз 30-сола боло — роҳ дода мешаванд.

Ҳар иштирокчӣ метавонад то ду сурудро ба забони русӣ иҷро кунад. Ба барномаи озмун сурудҳои халқии русӣ, сурудҳои солҳои Ҷанги Бузурги Ватанӣ, асарҳои мусиқии ретро, сурудҳо аз филмҳои тасвирӣ ва кинофилмҳои даврони шӯравӣ, инчунин мусиқии муосири эстрадии русӣ дохил мешаванд.

Тибқи талаботи ташкилкунандагон, сурудҳо бояд зинда иҷро шаванд. Истифодаи минусовка, ҳамроҳии ансамбл ва иштироки гурӯҳҳои рақсӣ иҷозат дода мешавад. Давомнокии як баромади озмунӣ набояд аз чор дақиқа зиёд бошад. Либоси саҳнавӣ низ бояд ба мазмун ва мавзӯи баромад мувофиқат кунад.

Иштирокчиёне, ки аз даври аввали интихобӣ мегузаранд, ба даври ниҳоии фестивал роҳ меёбанд. Барои ғолибон ҷоизаҳои махсус пешбинӣ шудаанд, ки номгӯй ва шартҳои гирифтани онҳо аз ҷониби ташкилкунандагон баъдан эълон хоҳанд шуд.

Барои иштирок довталабон бояд шакли электронии бақайдгириро пур намуда, инчунин анкетаи пуркардашуда ва имзошуда ва розигӣ барои коркарди маълумоти шахсиро пешниҳод кунанд.

Дархостро метавон тавассути шакли электронии бақайдгирӣ пешниҳод кард: Пешниҳоди дархост.

Шартҳои муфассали баргузории фестивал, талабот ба иштирокчиён ва тартиби интихоби онҳо дар Низомномаи озмун муайян шудаанд.

Баргузории фестивал-озмун дар вилояти Суғд дар баробари муайян намудани истеъдодҳои беҳтарини овозхонӣ, барои муаррифии гуногунии репертуари сурудҳои русзабон низ имконият фароҳам меорад. Дар барномаи он асарҳои халқӣ ва сурудҳои давраҳои гуногуни таърихӣ дар баробари мусиқии муосири русӣ пешниҳод мешаванд.

АКС: Хонаи русӣ дар шаҳри Хуҷанд