Душанбе, 14 июл, – АИ «Корвон Иттилоот». Ҷумҳурии Тоҷикистон дар арсаи Созмони Милали Муттаҳид мавқеи худро ҳамчун яке аз пешбарандагони асосии дипломатияи ҷаҳонии об боз ҳам таҳким бахшид.

Дар доираи Форуми сиёсии сатҳи баланд оид ба рушди устувор (HLPF-2026), ки дар Ню-Йорк идома дорад, чорабинии махсус таҳти унвони «Аз Душанбе то HLPF ва Абузабӣ: истифодаи равандҳои бисёрҷониба барои суръат бахшидан ба амалҳо дар соҳаи захираҳои об ба манфиати рушди устувор» баргузор гардид.

Ташкилкунандагони ҳамоиш Намояндагии доимии Ҷумҳурии Тоҷикистон назди СММ дар ҳамкорӣ бо Департаменти корҳои иқтисодӣ ва иҷтимоии СММ (UN DESA) ва Комиссияи иқтисодӣ ва иҷтимоии СММ барои Осиё ва Уқёнуси Ором (ESCAP) буданд.

Намояндаи доимии Ҷумҳурии Тоҷикистон назди СММ Ҷонибек Ҳикмат зимни суханронӣ дар назди ҳайати дипломатии байналмилалӣ натиҷаҳои Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018–2028»-ро, ки чанде пеш дар Душанбе баргузор гардид, муаррифӣ намуд. Ин ҳамоиш таҳти шиори «Муттаҳидсозии ҷаҳон барои об» зиёда аз 2500 намоянда аз 110 давлати ҷаҳонро ҷамъ овард.

Аз муҳимтарин натиҷаҳои амалии конференсия Эъломияи Душанбе, Ҳуҷҷати ҷамъбастии ҳамраисон ва Саҳми Душанбе ба Конфронси Созмони Милали Муттаҳид оид ба захираҳои оби соли 2026, ки дар шаҳри Абузабии Амороти Муттаҳидаи Араб баргузор мешавад, ба ҳисоб мераванд.

Таваҷҷуҳи махсуси ҷомеаи ҷаҳонӣ ба ташаббуси стратегии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон оид ба таъсиси Барномаи чаҳорчӯбии оби Душанбе равона гардид. Ҳадафи ин ташаббус ташкили платформаи фаромиллӣ барои таҳкими ҳамкорӣ ва ҳамоҳангсозии сиёсати кишварҳо дар самти идоракунии захираҳои об дар давраи баъд аз соли 2030 мебошад. Барномаи мазкур таҷрибаи чандинсолаи Раванди оби Душанберо ҷамъбаст намуда, ба коҳиши камбуди маблағгузорӣ ва густариши интиқоли технологияҳои «сабз» байни кишварҳои рушдёфта ва рӯ ба рушд мусоидат хоҳад кард.

Ба назари таҳлилгарони АИ «Корвон Иттилоот», муаррифии Барномаи чаҳорчӯбии оби Душанбе дар қароргоҳи Созмони Милали Муттаҳид на танҳо як дастоварди навбатии дипломатӣ, балки қадами муҳим дар ташаккули меъмории нави амнияти экологии ҷаҳон мебошад, ки дар он Тоҷикистон нақши ташаббускори асосиро иҷро мекунад.

Дар шароити тағйирёбии иқлим, суръат гирифтани обшавии пиряхҳои Помир ва афзоиши норасоии оби ширин дар Осиёи Марказӣ, Душанбе бо пешниҳоди механизмҳои мушаххаси ҳуқуқӣ ва институтсионалии идоракунии захираҳои об мавқеи худро ҳамчун яке аз марказҳои муҳими дипломатияи экологӣ таҳким мебахшад.

Коршиносони АИ «Корвон Иттилоот» таъкид мекунанд, ки Саҳми Душанбе ба яке аз ҳуҷҷатҳои асосии Конфронси вазирон дар Абузабӣ табдил хоҳад ёфт. Ворид гардидани ташаббусҳои Тоҷикистон ба рӯзномаи Созмони Милали Муттаҳид барои ҷалби грантҳо ва сармоягузориҳои байналмилалӣ ҷиҳати навсозии инфрасохтори гидроэнергетикӣ ва обёрии кишвар имкониятҳои нав фароҳам меорад. Бо ин роҳ, дипломатияи байналмилалии Президенти Ҷумҳурии Тоҷикистон муҳтарам Эмомалӣ Раҳмон ба омили муҳими таҳкими рушди устувор ва амнияти иқтисодии ҷумҳурӣ табдил меёбад.

АКС: Намояндагии доимии Ҷумҳурии Тоҷикистон назди Созмони Милали Муттаҳид