Душанбе, 14 май, – АИ «Корвон Иттилоот». Дар поёни иштироки худ дар 35-умин сессияи Конфронси минтақавии Созмони озуқа ва кишоварзии СММ (ФАО) барои Аврупо ва Осиёи Марказӣ (РКЕ35), директори генералии ФАО Цюй Дунъюй аҳамияти ҳамбастагии минтақавӣ, инноватсия ва сармоягузориро барои суръат бахшидан ба табдили низомҳои агроозуқаворӣ дар Аврупо ва Осиёи Марказӣ дар шароити фишорҳои афзояндаи иқлимӣ, иқтисодӣ ва геополитикӣ таъкид намуд.
Конфронс, ки таҳти шиори «Якҷоя барои устуворӣ» баргузор гардид, вазирон ва намояндагони баландпояи тамоми минтақаро барои баррасии роҳҳои бунёди низомҳои самараноктар, фарогир, устувор ва қобилияти баланди мутобиқшавӣ дар соҳаи агроозуқа гирд овард.
Дар суханронии ифтитоҳии худ директори генералӣ қайд кард, ки чолишҳои ба ҳам вобаста, аз ҷумла бӯҳрони иқлимӣ, номуайянии иқтисодӣ ва халалдоршавии занҷираҳои таъминот, кишварҳои минтақаро водор месозанд, ки ба амалиёти ҳамоҳангшуда, шарикии қавитар ва ҳалли инноватсионӣ такя намоянд.
Ӯ аз иштирокчиён даъват кард, ки дар маркази баҳс ду вазифаи калидӣ қарор дода шавад: баланд бардоштани устувории низомҳои агроозуқа дар саросари минтақа ва ҷалби сармоягузориҳои зарурӣ барои дастгирӣ ва нигоҳдории ин устуворӣ.
Дар доираи конфронс директори генералӣ як силсила мулоқотҳои дуҷониба бо вазирон ва шахсони расмии баландпоя баргузор намуд, ки дар онҳо масъалаҳои таҳкими ҳамкорӣ дар самтҳои идоракунии оқилонаи захираҳои об, ҳифзи замин, устувории иқлим, кишоварзии рақамӣ, ҳифзи гуногунии биологӣ ва сармоягузорӣ ба рушди деҳот баррасӣ шуданд.
Ҷавонон, илм, инноватсия ва сармоягузорӣ дар маркази таваҷҷуҳ
Дар баробари музокироти сатҳи вазирон, директори генералӣ дар як силсила чорабиниҳои GENERATION YSInvest иштирок кард, ки ба тавонмандсозии ҷавонон, илм ва инноватсия, инчунин сармоягузорӣ ҳамчун омилҳои калидии табдили низомҳои агроозуқаворӣ бахшида шудаанд. Ӯ иқтидори бузурги минтақаро дар пешбурди рушди устувори кишоварзӣ тавассути таҳкими ҳамкорӣ, ҷорӣ намудани инноватсия ва сармоягузориҳои мақсаднок таъкид намуд.
Дар доираи ин чорабинӣ ӯ инчунин дар муколамаи вазирон оид ба сармоягузорӣ иштирок кард, ки ба кушодани зарфияти Осиёи Марказӣ ҳамчун минтақаи муҳими истеҳсоли ғалла бахшида шуда буд. Директори генералӣ аҳамияти идоракунии устувори захираҳои табиӣ, занҷираҳои устувори эҷоди арзиш дар бахши гандум ва афзоиши сармоягузориҳоро барои таҳкими амнияти озуқавории минтақавӣ ва ҷаҳонӣ таъкид кард.
Намоишгоҳи интерактивии GENERATION YSInvest, ки дар ҳошияи конфронс баргузор шуд, равишҳои инноватсионӣ, технологияҳо ва шарикиҳоро намоиш дод, ки ба пайвастани деҳқонон, ҷавонон, занон, инноваторон, сиёсатгузорон ва сармоягузорон барои татбиқи ҳалли амалӣ дар соҳаи агроозуқа дар саросари минтақа мусоидат мекунанд.
Шиносоӣ бо инноватсияҳои кишоварзии Тоҷикистон
Рӯзи сешанбе директори генералӣ сафари худро ба Тоҷикистон бо боздид аз Неругоҳи барқи обии Норак — яке аз иншооти калидии гидроэнергетикӣ ва инфрасохтори обии кишвар — анҷом дод. Дар он ҷо масъалаҳои идоракунии маҷмӯии захираҳои об ва истифодаи оқилонаи захираҳои табиӣ барои табдили низомҳои агроозуқа баррасӣ шуданд, ки барои тамоми минтақа аҳамияти калидӣ доранд.
Ӯ инчунин аз як маҷмааи нави гармхонаҳо боздид кард, ки технологияҳои муосири истеҳсоли гармхонагиро нишон медиҳад. Ин маҷмаа ба рушди боғдорӣ дар тӯли сол, баланд бардоштани самаранокии истифодаи захираҳо ва таҳкими занҷираҳои маҳаллии таъминоти озуқа равона шудааст. Барнома боздид аз боғҳои анор дар атрофи шаҳри Норакро низ дар бар гирифт.
Илова бар ин, ӯ дар ифтитоҳи намоишгоҳи кишоварзӣ, ки аз ҷониби Ҳукумати Тоҷикистон ба муносибати 35-умин сессияи Конфронси минтақавии ФАО барои Аврупо ва Осиёи Марказӣ ташкил шуда буд, иштирок намуд. Дар он маҳсулоти миллӣ, инноватсия ва технологияҳо муаррифӣ гардида, талошҳои кишвар барои рушди устувори кишоварзӣ, амнияти озуқаворӣ ва беҳтар намудани шароити зиндагӣ дар деҳот намоиш дода шуданд.
Ин сафарҳо нақши муҳими инноватсия, инфрасохтор ва ҳамкории минтақавиро дар таҳкими устуворӣ ва суръат бахшидан ба табдили низомҳои агроозуқа дар Аврупо ва Осиёи Марказӣ таъкид карданд. Конфронси минтақавии ФАО дар Душанбе дар тӯли ҳафта идома меёбад ва интизор меравад, ки иштирокчиён афзалиятҳои минтақавиро тасдиқ намуда, тавсияҳо барои кори ФАО дар ду соли оянда қабул намоянд.
Фото: ©ФАО/Азиз Саттори