Душанбе, 12 май, – АИ «Корвон Иттилоот». Дар пасманзари афзоиши таҳдидҳои глобалӣ — тағйирёбии иқлим, ноустувории амнияти озуқаворӣ ва зарурати навсозии кишоварзӣ — Душанбе яке аз бузургтарин майдонҳои байналмилалии муҳокимаронӣ дар бахши агросаноатиро мизбонӣ мекунад.
Дар Донишгоҳи аграрии Тоҷикистон ба номи Шириншо Шотемур Форуми байналмилалии «Сармоягузорӣ ба илм ва инноватсияҳои ҷавонон: дурнамои минтақавии Форуми ҷаҳонии озуқаворӣ барои Аврупо ва Осиёи Марказӣ» баргузор мешавад, ки дар доираи Конфронси 35-уми минтақавии Созмони озуқаворӣ ва кишоварзии Созмони Милали Муттаҳид (ФАО) ташкил гардидааст.
Форум олимони ҷавон, кишоварзон, намояндагони созмонҳои байналмилалӣ, сармоягузорон ва сохторҳои давлатиро барои муҳокимаи ояндаи низомҳои агросаноатии минтақа муттаҳид намуд. Мавзӯи меҳварии ҳамоиш нақши ҷавонон, илм ва инноватсия дар таъмини рушди устувори кишоварзӣ ва амнияти озуқаворӣ мебошад.
Дар чорабинӣ Директори генералии ФАО Цюй Дунъюй, Вазири кишоварзии Ҷумҳурии Тоҷикистон Қурбон Ҳакимзода, намояндагони созмонҳои ҷавонони Аврупо ва Осиёи Марказӣ, коршиносони байналмилалӣ, муҳаққиқон ва намояндагони ҷомеаи илмӣ иштирок доранд.
Ташкилкунандагон таъкид мекунанд, ки ҳадафи асосии форум фароҳам овардани фазо барои муколамаи мустақим миёни ҷавонон, доираҳои илмӣ ва сиёсатмадорон, инчунин таҳияи равишҳои муосир барои рушди бахши аграрӣ мебошад. Таваҷҷуҳи махсус ба дастгирии деҳқонони ҷавон, рушди деҳот ва ҷорӣ намудани технологияҳои инноватсионӣ дар соҳаи кишоварзӣ равона шудааст.
Дар давоми рӯз иштирокдорон мушкилоте, ки ҷавонони деҳотии кишварҳои Аврупо ва Осиёи Марказӣ бо онҳо рӯ ба рӯ мешаванд, механизмҳои дастгирии соҳибкорон ва муҳаққиқони ҷавон, инчунин нақши шабакаҳои ҷавонон ва платформаҳои байналмилалиро дар пешбурди инноватсияҳо баррасӣ мекунанд.
Таҷриба ва таҳқиқоти худро кишоварзон ва мутахассисони ҷавон аз Тоҷикистон, Туркия, Юнон, Ирландия, Гурҷистон ва дигар кишварҳои минтақа муаррифӣ менамоянд. Дар байни иштирокдорон — кишоварзи ҷавони тоҷик Жасмина Саидакрамова, соҳибкори турк Ойкю Чил ва муҳаққиқи юнонӣ Александрос Татаридос ҳастанд.
Дар нимаи дуюми рӯз нишасти «Муколамаи илм ва сиёсат — пайванди дониш ва захираҳо» баргузор мегардад, ки ба масъалаҳои сармоягузорӣ ба илми аграрӣ ва таҳкими ҳамкорӣ миёни давлат, ҷомеаи илмӣ ва сармоягузорон бахшида шудааст. Бо маърӯзаҳои калидӣ олими пешбари ФАО Чарльз Спиллейн, директори Маркази муштараки ФАО/МАГАТЭ Дунсин Фэн ва мутахассисони созмон оид ба илм ва инноватсия суханронӣ мекунанд.
Коршиносон бар онанд, ки баргузории чунин форуми сатҳи баланд дар Душанбе нақши рӯзафзуни Тоҷикистонро дар рӯзномаи байналмилалии амнияти озуқаворӣ, устувории иқлим ва дипломатияи об инъикос мекунад. Эътирофи байналмилалии ташаббусҳои Президенти Ҷумҳурии Тоҷикистон муҳтарам Эмомалӣ Раҳмон дар соҳаи об ва иқлим мавқеи кишварро ҳамчун иштирокчии фаъоли муколамаи ҷаҳонӣ оид ба рушди устувор таҳким мебахшад.
Тибқи маълумоти ФАО, имрӯз зиёда аз 30 фоизи аҳолии Аврупо ва Осиёи Марказӣ дар деҳот зиндагӣ мекунад ва ҷалби ҷавонон ба бахши кишоварзӣ яке аз омилҳои асосии рушди дарозмуддати иқтисодӣ ва амнияти озуқавории минтақа арзёбӣ мешавад.
АКС: АМИТ «Ховар»