Душанбе, 21 май, – АИ «Корвон Иттилоот». Дар маҷмааи IT Park-и пойтахт «Ҳафтаи илм, технология, инноватсия ва ихтироъкории наврасон ва ҷавонони шаҳри Душанбе» оғоз гардид — як майдони бузурги илмӣ ва технологӣ, ки хонандагон, омӯзгорон, мутахассисони IT, намояндагони илм ва соҳибкорони соҳаи инноватсиониро гирди ҳам овард.

Ифтитоҳи ин ҳафта ба Рӯзи ҷавонони Тоҷикистон, ки ҳамасола 23 май таҷлил мегардад, бахшида шуда, дар доираи татбиқи барномаи давлатӣ «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илм ва маориф барои солҳои 2020–2040» баргузор мешавад.

Аз соатҳои аввали чорабинӣ IT Park ба фазои намоиши идеяҳои нав ва ташаббусҳои технологӣ табдил ёфт. Дар ин ҷо намоиши дастовардҳои илмӣ, техникӣ ва инноватсионии муассисаҳои таълимӣ, марказҳои илмӣ ва ширкатҳои IT-и Душанбе ташкил карда шуд.

Ташкилкунандагон ба ташкили майдони муколамаи касбӣ ва ҷамъиятӣ аҳамияти махсус доданд. Дар доираи ҳафта машварати IT бо иштироки намояндагони сохторҳои давлатӣ, бахши телекоммуникатсионӣ, шарикони байналмилалии рушд ва воситаҳои ахбори омма баргузор гардид. Дар чорабинӣ беш аз 250 намояндаи бахшҳои гуногун иштирок намуданд.

Ба гуфтаи ташкилкунандагон, сухан танҳо дар бораи як қатор чорабиниҳои мавзӯӣ намеравад, балки ҳадаф ташаккули муҳити нави таълимӣ мебошад, ки дар он технологияҳо ба қисми фарҳанги муосири шаҳрӣ ва бозори ояндаи меҳнат табдил меёбанд.

Ҳафтаи илм бо ташаббуси Раиси шаҳри Душанбе баргузор шуда, ба баланд бардоштани сифати таҳсилот, рушди тафаккури техникӣ ва тарғиби ҷаҳонбинии илмӣ миёни ҷавонон равона гардидааст. Аз ҷумла, дастгирии ихтироъкорӣ, васеъ намудани дастрасии хонандагон ба технологияҳои муосир, рушди қобилиятҳои эҷодӣ ва дарёфти истеъдодҳои нав дар соҳаи фанҳои дақиқ аз ҳадафҳои асосии он маҳсуб мешаванд.

Дар давоми ҳафта дар пойтахт озмунҳои гуногуни шаҳрӣ оид ба технологияҳои иттилоотӣ ва инноватсия баргузор мегарданд, аз ҷумла озмуни «Илм ва амалия», озмуни «Беҳтарин синфхонаи технологияҳои иттилоотӣ», инчунин форуми наврасони даврони технологияҳо.

Ҳамчунин, хонандагон ва омӯзгорон имконият пайдо мекунанд, ки аз ширкатҳои IT ва муассисаҳои технологии Душанбе боздид намуда, бо инфрасохтори рақамӣ ва самтҳои амалии рушди соҳа шинос шаванд.

Дар пасманзари таваҷҷуҳи рӯзафзуни Тоҷикистон ба иқтисоди рақамӣ ва навсозии технологӣ чунин ташаббусҳо ҳамчун қисми стратегияи дарозмуддати омода намудани насли нави мутахассисон арзёбӣ мешаванд — наслеро, ки метавонад дар шароити тағйироти глобалии рақамӣ фаъолият намояд.

«Ҳафтаи илм, технология, инноватсия ва ихтироъкории наврасон ва ҷавонони шаҳри Душанбе» то 22 май идома мекунад. Ғолибони озмунҳо бо туҳфаҳо ва ҷоизаҳои хотиравӣ қадрдонӣ хоҳанд шуд.

АКС: Хадамоти алоқаи назди Ҳукумати Ҷумҳурии Тоҷикистон