Душанбе, 29 июл, – АИ «Корвон Иттилоот». Дар шаҳри Душанбе ҷаласаи ҳамзамони Дафтари минтақавии аврупоии
Созмони ҷаҳонии тандурустӣ (ТУТ), ки ба баланд бардоштани сифати хизматрасонӣ дар соҳаи солимии равонии кӯдакон ва наврасон бахшида шуда буд, ба анҷом расид. Чорабинӣ рӯзҳои 24–25 июли соли 2026 баргузор гардида, 40 намоянда аз 10 кишвари Осиёи Марказӣ ва Иттиҳоди Давлатҳои Мустақил-ро муттаҳид намуд.

Дар давоми ду рӯз намояндагони мақомоти давлатӣ, коршиносони байналмилалӣ, мутахассисони соҳаи тандурустӣ ва ҷавонон таҷрибаи худро мубодила намуда, масъалаҳои такмили низоми хизматрасонӣ дар самти ҳифзи солимии равонии кӯдакон ва наврасонро баррасӣ карданд.

Ба иштирокчиён абзорҳои муҳими Созмони ҷаҳонии тандурустӣ, аз ҷумла стандартҳои сифати хизматрасонӣ, воситаи аудити клиникӣ барои арзёбӣ ва беҳтар намудани сифати кӯмак, инчунин низоми харитасозии хизматрасониҳои солимии равонӣ муаррифӣ гардиданд.

Дар доираи барнома ду машғулияти амалӣ оид ба такмили сифати хизматрасонӣ ва иштироки фаъоли ҷавонон баргузор шуд. Намояндагони ҷавонон таҷриба ва пешниҳодҳои худро иброз дошта, аҳамияти ҷалби кӯдакон ва наврасонро ба қабули қарорҳои марбут ба саломатӣ ва некӯаҳволии онҳо бори дигар таъкид намуданд.

Ин ҳамоиш идомаи мантиқии фаъолияти Мактаби аврупоии Созмони ҷаҳонии тандурустӣ оид ба сифати хизматрасонии тиббӣ ва бехатарии беморон барои кишварҳои Осиёи Марказӣ буда, қадами муҳим дар роҳи рушди хизматрасониҳои дастрас, босифат ва ба инсон нигаронидашуда дар соҳаи солимии равонӣ арзёбӣ мешавад.

АКС: Дафтари минтақавии аврупоии Созмони ҷаҳонии тандурустӣ (ТУТ).