Душанбе, 13 май, – АИ «Корвон Иттилоот». Дар пойтахти Тоҷикистон Конфронси 35-уми минтақавии Созмони озуқаворӣ ва кишоварзии СММ (ФАО) барои Аврупо ва Осиёи Марказӣ идома дошта, тадриҷан Душанберо ба яке аз майдонҳои муҳими байналмилалии баррасии ояндаи низомҳои агросаноатии минтақа табдил медиҳад.

Дар рӯзи дуюми кори конфронс таваҷҷуҳи асосии иштирокчиён ба масъалаҳои шарикии минтақавӣ, табодули дониш ва баланд бардоштани самаранокии ҳамкорӣ дар соҳаи кишоварзӣ ва амнияти озуқаворӣ равона гардид.

Субҳи 12 май  дар «Кохи Сомон» нишасти махсус таҳти унвони «Барномаҳои шарикӣ дар Аврупо ва Осиёи Марказӣ — модели ҳамкории минтақавӣ ва табодули дониш» баргузор шуд. Дар ҷараёни чорабинӣ намояндагони кишварҳои минтақа, созмонҳои байналмилалӣ ва доираҳои коршиносӣ масъалаҳои рушди ҳамкорӣ миёни давлатҳо ва роҳҳои муосири баланд бардоштани сифат ва устувории бахши аграриро баррасӣ карданд.

Коршиносон таъкид мекунанд, ки имрӯз барои кишварҳои Аврупо ва Осиёи Марказӣ на танҳо масъалаҳои истеҳсоли озуқаворӣ, балки устувории кишоварзӣ дар шароити тағйирёбии иқлим, камбуди захираҳои обӣ ва ноустувории иқтисоди ҷаҳонӣ аҳамияти махсус касб мекунад. Аз ҳамин ҷост, ки конфронси ФАО дар Душанбе ҳамчун майдони муҳими таҳияи қарорҳои муштарак ва мубодилаи таҷрибаи амалӣ арзёбӣ мешавад.

Дар доираи форум баҳсҳои мавзӯӣ, мулоқотҳои коршиносӣ ва чорабиниҳои махсус вобаста ба инноватсия дар соҳаи аграрӣ, рушди деҳот, амнияти озуқаворӣ ва ҳамкории байналмилалӣ идома доранд.

Конфронси 35-уми минтақавии ФАО барои Аврупо ва Осиёи Марказӣ то 15 май дар Душанбе идома мекунад. Дар рӯзҳои наздик баргузории баҳсҳои нави панелӣ, мулоқотҳои сатҳи баланд ва муаррифии ташаббусҳои муштарак дар назар аст.

Баргузории чунин ҳамоиши бузурги байналмилалӣ дар Тоҷикистон аз болоравии нақши кишвар дар рӯзномаи минтақавии рушди устувор, дипломатияи об ва амнияти озуқаворӣ шаҳодат медиҳад.

АКС: АИ «Корвон Иттилоот»