Душанбе, 22 ноябр, – АИ Корвон Иттилоот. Дар пойтахт ҷаласаи корӣ оид ба ҷорӣ намудани лоиҳаи такмилёфтаи «Харитаи электронии шаҳри Душанбе» баргузор шуд.

Вохӯрӣ таҳти роҳбарии муовини якуми Раиси шаҳри Душанбе Бахтиёр Шарифӣ доир гардида, намояндагони КВД «Шаҳри ҳушманд (Smart City)», як қатор вазорату идораҳо, сохторҳои шаҳрӣ, Бонки Авруосиёии Рушд ва роҳбарияти ширкатҳои мобилии кишвар дар он иштирок карданд.

Дар ҷараёни мулоқот таҳиягарон версияи навшудаи геопортали шаҳриро бо модули таҳлилӣ муаррифӣ намуданд. Ба иштирокчиён имкониятҳои асосии низом нишон дода шуда, аз ҷумла тасвирҳои инфрасохтори шаҳр, ҳамгироии иттилоот аз ниҳодҳои гуногун ва абзорҳои таҳлилӣ барои мониторинг ва банақшагирии рушди пойтахт пешниҳод гардид.

Таъкид шуд, ки ҳар як сохтори пайвастшуда ба лоиҳа дар пур ва навсозии маълумот саҳм мегузорад, ки ин ба ташкили як майдони ягонаи рақамӣ барои идоракунии раванди шаҳрӣ замина фароҳам меорад.

Иштирокчиёни ҷаласа зикр карданд, ки татбиқи харитаи электронӣ қадами муҳим дар самти рақамикунонии идоракунии шаҳр ба ҳисоб меравад. Лоиҳа ба баланд бардоштани сатҳи хизматрасониҳои давлатӣ, беҳсозии кори сохторҳои коммуналӣ ва шаҳрӣ, тезонидани баррасии муроҷиатҳои шаҳрвандон ва таъмин намудани шаффофияти бештари равандҳои идоракунӣ равона шудааст.

Платформа имкон медиҳад, ки идоракунии инфрасохтор — аз хизматрасониҳои коммуналӣ то шабакаи нақлиёт ва иншооти иҷтимоӣ — бо усулҳои муосир ва муассир сурат гирад.

Лоиҳаи «Харитаи электронии шаҳри Душанбе» бахше аз барномаи бузурги татбиқи консепсияи «Шаҳри ҳушманд» буда, ҳамчун пояи стратегӣ барои идомаи рақамикунонии пойтахт арзёбӣ мешавад. Дар анҷоми ҷаласа қарор шуд, ки ҳамоҳангсозии байниидоравӣ густариш ёбад, корҳо оид ба такмили минбаъдаи платформа идома ёбанд ва ҳамгироии он бо хизматрасониҳои мавҷудаи шаҳрдорӣ таъмин карда шавад.

АКС: Мақомоти иҷроияи ҳокимияти давлатии шаҳри Душанбе