Душанбе, 26 май, – АИ «Корвон Иттилоот». 25 май Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо гурӯҳи муовинони Дабири кулли Созмони Милали Муттаҳид, ки барои иштирок дар Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018–2028» ба Душанбе омадаанд, мулоқот намуданд.
Ин мулоқот дар ҳоле баргузор гардид, ки Душанбе рӯзҳои охир ба яке аз минбарҳои асосии байналмилалӣ барои баррасии масъалаҳои об, иқлим ва рушди устувор табдил ёфтааст. Ҳузури намояндагони воломақоми СММ бори дигар аҳамияти рӯзафзуни «Раванди обии Душанбе»-ро дар низоми муколамаи ҷаҳонӣ нишон медиҳад.
Сарвари давлат муовини Дабири кулли СММ ва котиби иҷроияи ЭСКАТО Армида Салсиах Алисҷабана, муовини Дабири кулли СММ ва фиристодаи махсуси Дабири кулл оид ба захираҳои об Ретно Марсуди, инчунин ректори Донишгоҳи СММ — муовини Дабири кулли СММ Тшилидзи Марвалуро хайрамақдам гуфтанд.
Дар оғози мулоқот Президенти Тоҷикистон ба меҳмонон барои иштирок дар конфронс ва дастгирии доимии ташаббусҳои байналмилалии Тоҷикистон, бахусус дар доираи «Раванди обии Душанбе», изҳори сипос намуданд. Таъкид гардид, ки ин раванд дар солҳои охир ба як платформаи устувори муколамаи ҷаҳонӣ оид ба масъалаҳои об табдил ёфтааст.
Дар ҷараёни суҳбат ба сатҳи ҳамкории Созмони Милали Муттаҳид бо Тоҷикистон дар самтҳои гуногун — аз захираҳои обӣ ва тағйирёбии иқлим то нақлиёт, логистика, энергетикаи устувор, кишоварзӣ, рақамикунонӣ ва технологияҳои «сабз» — баҳои баланд дода шуд.
Махсусан зикр гардид, ки маҳз бо ташаббуси Тоҷикистон дар Созмони Милали Муттаҳид 14 қатънома вобаста ба масъалаҳои об қабул шудааст. Имрӯз ин дастовард яке аз намунаҳои барҷастаи дипломатияи байналмилалии Тоҷикистон ба шумор меравад, ки масъалаҳои об, пиряхҳо ва иқлимро ба бахши муҳими рӯзномаи ҷаҳонӣ табдил додааст.
Ҷонибҳо изҳори боварӣ намуданд, ки конфронси имсола ба минбари муҳими байналмилалӣ барои муттаҳид сохтани талошҳои давлатҳо ва созмонҳои байналмилалӣ дар самти дипломатияи об ва ҷустуҷӯи роҳҳалҳои амалӣ оид ба масъалаҳои иқлим ва идоракунии устувори захираҳои обӣ мубаддал мегардад.
Қисмати муҳими мулоқот ба идомаи татбиқи қарорҳои форумҳои қаблӣ ва омодагӣ ба конфронсҳои навбатии солҳои 2026 ва 2028 бахшида шуд. Ҳамин тавр, Душанбе тадриҷан мавқеи худро ҳамчун маркази доимии муколамаи байналмилалӣ оид ба масъалаҳои об ва иқлим таҳким мебахшад.
Ҳамчунин ба ҳамкорӣ бо Донишгоҳи СММ таваҷҷуҳи махсус зоҳир гардид. Таъкид шуд, ки густариши робитаҳои илмӣ ва амалии муҳаққиқону коршиносони тоҷик бо ин муассисаи бонуфуз метавонад ба рушди дипломатияи илмӣ ва таҳияи роҳҳалҳои нави рушди устувор мусоидат намояд.
Ин мулоқот бори дигар нишон дод, ки Тоҷикистон на танҳо иштирокчии фаъоли равандҳои ҷаҳонӣ мебошад, балки рӯзномаи байналмилалии худро низ дар масъалаҳои об, иқлим, илм ва рушди устувор ташаккул медиҳад.
АКС: Хадамоти матбуоти Президенти Ҷумҳурии Тоҷикистон