Душанбе, 13 май, – АИ «Корвон Иттилоот». Дар Душанбе силсилаи чорабиниҳои оммавии варзишӣ бахшида ба Рӯзи ҷавонони Тоҷикистон оғоз мегардад. Мақомоти иҷроияи ҳокимияти давлатии шаҳри Душанбе дар ҳамкорӣ бо Кумитаи кор бо ҷавонон ва варзиши назди Ҳукумати Ҷумҳурии Тоҷикистон сокинон ва ҷавонони фаъоли пойтахтро ба иштирок дар Дави миллӣ ва марафони велосипедронӣ даъват намуд.

Чорабинии бузурги варзишӣ рӯзи 17 май баргузор шуда, ҳаводорони тарзи ҳаёти солим, дӯстдорони варзиш ва ҳамаи хоҳишмандонро гирди ҳам меорад.

Тибқи иттилои ташкилкунандагон, оғози чорабинӣ соати 07:00 саҳар дар назар дошта шудааст. Масири дав ва марафон аз назди маҳаллаи Чорбоғ оғоз шуда, то нуқтаи муайяншудаи анҷом идома меёбад.

Ба гуфтаи масъулон, ҳадафи баргузории чунин чорабиниҳо тарғиби фарҳанги ҷисмонӣ, таҳкими рӯҳияи ватандӯстӣ ва рушди фарҳанги варзиш дар ҷомеа мебошад. Таваҷҷуҳи махсус ба ҷалби ҷавонон ба тарзи ҳаёти фаъол ва ташаккули муҳити солими иҷтимоӣ равона шудааст.

Дар солҳои охир Душанбе мавқеи худро ҳамчун яке аз марказҳои фаъоли варзишии минтақа таҳким бахшида, пайваста мусобиқаҳои байналмилалӣ, марафонҳои оммавӣ ва аксияҳои ҷамъиятии варзиширо баргузор менамояд.

Интизор меравад, ки Дави миллӣ ва марафони велосипедронӣ шумораи зиёди иштирокчиёни синну соли гуногунро ҷамъ оварда, ба қисми муҳими барномаи идона бахшида ба Рӯзи ҷавонони Тоҷикистон табдил ёбанд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон