Душанбе, 28 феврал, – АИ «Корвон Иттилоот». 27 феврал дар шаҳри Душанбе видеокол бо иштироки муовини Раиси шаҳри Душанбе ва роҳбарияти КВД «Шаҳри хушманд» бо намояндагони Бонки Рушди Авруосиё баргузор гардид.

Дар чорабинӣ муовини Раиси шаҳри Душанбе Саломзода Рахмиддин Салом, сардори Департаменти нақлиёти Душанбе Абдувохидзода Хусейн, директори КВД «Шаҳри хушманд» Саади Самадзод, муовини директор оид ба масъалаҳои техникӣ Мансуров Бахром, директори Фонди ташаббусҳои рақамии Бонки Рушди Авруосиё Петров Александр Владимирович ва директори лоиҳаҳои намояндагии БРA дар Ҷумҳурии Тоҷикистон Кулиев Парвиз ширкат намуданд.

Дар маркази баррасӣ се ташаббуси стратегӣ қарор дошт: сохтмони маркази бузурги логистикӣ дар Душанбе, моделсозии низоми нақлиёти шаҳрӣ ва ташкили парки нави автобусҳои муосир. Ин тадбирҳо ба беҳтар кардани сифати хизматрасонии нақлиёти ҷамъиятӣ, кам кардани вақти сафар ва такомули инфрасохтори шаҳр равона шудаанд.

Иштирокчиён аҳамияти татбиқи технологияҳои рақамӣ барои идоракунии ҷараёнҳои нақлиётӣ, банақшагирии маршрутҳо ва оптимизатсияи кори хадамоти муниципалӣ таъкид карданд. Ҳамкории муштарак бо Бонки Рушди Авруосиё ҳамчун қадами муҳим дар татбиқи лоиҳаҳо барои рушди устувори муҳити шаҳр арзёбӣ гардид.

Дар ҷараёни видеокол қадамҳои муштарак барои татбиқи лоиҳаҳо, аз ҷумла таҳияи нақшаҳои муфассал барои сохтмони маркази логистикӣ, навсозии парки автобусҳо ва ҷорӣ намудани воситаҳои рақамӣ барои мониторинг ва идоракунии нақлиёт, мувофиқа шуданд. Соҳибони чорабинӣ таъкид карданд, ки амалӣ шудани ин ташаббусҳо самаранокии муҳити шаҳриро баланд карда, сифати хизматрасонии шаҳрвандонро беҳтар хоҳад кард ва заминаи рақамигардонии пойтахтро фароҳам меорад.

АКС: Сомонаи расмии шаҳри Душанбе, https://dsc.tj.