Душанбе, 11 май, – АИ «Корвон Иттилоот».  9 майи соли 2026 дар ноҳияи Ҷаббор Расулов бахшида ба 81-солагии Ғалаба дар Ҷанги Бузурги Ватании солҳои 1941–1945 чорабиниҳои тантанавӣ баргузор гардид. Чорабиниҳои асосӣ дар Боғи фарҳангӣ-фароғатӣ назди пайкараи «Сарбози номаълум» доир шуда, маросими гулчанбаргузорӣ ва ҳамоиши идона баргузор шуд.

Дар маросим раиси ноҳияи Ҷаббор Расулов Юлдошзода Олимбек, муовини Раиси вилояти Суғд Анвар Яъқубӣ, намояндагони мақомоти ҳифзи ҳуқуқ, собиқадорони ҷангу меҳнат, кормандони ташкилоту муассисаҳо, омӯзгорону донишҷӯён ва ҷавонони фаъоли ноҳия иштирок намуданд.

Иштирокдорон ба поси хотираи афсарону сарбозон ва ҳамаи қурбониёни Ҷанги Бузурги Ватанӣ назди муҷассамаи «Сарбози номаълум» гулу гулчанбар гузоштанд.

Раиси ноҳия Юлдошзода Олимбек зимни суханронӣ сокинони ноҳияро ба муносибати Рӯзи Ғалаба табрик гуфта, ба ҳамагон сулҳу субот, саодатмандӣ ва комёбиҳо таманно намуд. Таъкид гардид, ки қаҳрамониву ҷоннисориҳои иштирокчиёни ҷанг ҳамеша дар хотираи мардум боқӣ монда, барои насли ҷавон намунаи олии ватандӯстӣ ва фидокорӣ мебошанд.

Дар ҷараёни чорабинӣ аз суханони Президенти Ҷумҳурии Тоҷикистон муҳтарам Эмомалӣ Раҳмон ёдовар шуданд, ки Ғалаба бар фашизм натиҷаи муборизаи муштараки халқҳои собиқ Иттиҳоди Шӯравӣ ва дигар кишварҳои ҷаҳон барои ҳифзи озодӣ ва истиқлолияти инсоният буд.

Муовини Раиси вилояти Суғд Анвар Яъқубӣ инчунин паёми табрикии Раиси вилояти Суғд Раҷаб Аҳмадзодаро ба муносибати Рӯзи Ғалаба ба самъи ҳозирин расонида, сокинони ноҳияро бо ин санаи муҳими таърихӣ табрик намуд.

Зикр гардид, ки таҷлили ҳамасолаи Рӯзи Ғалаба аҳамияти сулҳу дӯстӣ, ҳамдигарфаҳмӣ ва ҳамкории халқҳоро барои таъмини суботу амнияти ҷомеа бори дигар таъкид мекунад.

Дар анҷоми чорабинӣ барномаи фарҳангии идона бахшида ба Рӯзи Ғалаба пешниҳоди иштирокдорон гардида, ба ҳамоиш рӯҳу шаҳомати тоза бахшид.

АКС: Мақомоти иҷроияи ҳокимияти давлатии ноҳияи Ҷаббор Расулов