Душанбе, 31 июл, – АИ «Корвон Иттилоот». Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон 29 июл бо даъвати расмии Президенти Ҷумҳурии Қазоқистон ба шаҳри Остона ташриф оварда, дар маросими бошукӯҳи ифтитоҳи мусобиқаи байналмилалии «Бозиҳои оянда – 2026» иштирок намуданд.
Ин форуми байналмилалӣ, ки намояндагони даҳҳо кишвари ҷаҳонро муттаҳид намудааст, рамзи марҳилаи нави рушди варзиш ба шумор меравад, ки дар он омодагии ҷисмонӣ бо имкониятҳои технологияҳои рақамӣ, зеҳни сунъӣ ва фазои киберӣ ҳамоҳанг гардидааст.
Консепсияи phygital (Physical + Digital) тамоюлҳои нави ҷаҳониро инъикос намуда, нишон медиҳад, ки рақобати варзишӣ имрӯз танҳо маҳорати ҷисмонӣ набуда, балки сатҳи дониш, қобилияти технологӣ ва тафаккури муҳандисии иштирокчиёнро низ дар бар мегирад.
Баргузории «Бозиҳои оянда – 2026» аз рушди босуръати саноати ҷаҳонии варзиш, ки ба рақамикунонӣ ва ҷорӣ намудани технологияҳои пешрафта такя мекунад, шаҳодат медиҳад. Ин мусобиқа ҳамзамон чанд ҳадафи стратегиро амалӣ месозад: ҳамгироии намудҳои анъанавии варзиш бо технологияҳои муосир, таҳкими робитаҳои гуманитарии байни давлатҳо ва ташаккули меъёрҳои нави байналмилалӣ дар соҳаи варзиши рақамӣ.
Форуми мазкур ҳамчунин аҳамияти бузурги дипломатӣ дорад. Имрӯз чорабиниҳои бузурги варзишӣ ба воситаи муассири густариши ҳамкориҳои байналмилалӣ, таҳкими эътимоди байни халқҳо ва пешбурди ташаббусҳои муштарак дар соҳаҳои маориф, илм, сиёсати ҷавонон ва технологияҳои пешрафта табдил ёфтаанд.
Иштироки Пешвои миллат муҳтарам Эмомалӣ Раҳмон дар маросими ифтитоҳи «Бозиҳои оянда – 2026» самти стратегии Тоҷикистонро дар роҳи дастгирии рушди инноватсионӣ ва ҳамгироии фаъолона ба экосистемаи ҷаҳонии рақамӣ боз ҳам равшантар менамояд. Дар шароити тағйироти босуръати иқтисоди ҷаҳонӣ маҳз ҳамгироии варзиш, технология ва маориф ба яке аз омилҳои асосии ташаккули сармояи рақобатпазири инсонӣ мубаддал гардидааст.
Имрӯз варзиши фидҷитал тадриҷан аз як навъи нави рақобати варзишӣ ба воситаи муҳими дипломатияи рақамӣ табдил меёбад, ки барои таҳкими ҳамдигарфаҳмӣ, густариши ҳамкориҳои ҷавонон ва пешбурди рӯзномаи инноватсионӣ мусоидат мекунад. Барои Тоҷикистон иштирок дар чунин ташаббусҳои байналмилалӣ имкониятҳои нави ҳамгироии ҷавонони кишвар ба фазои ҷаҳонии инноватсионӣ ва тавсеаи ҳамкориҳои гуманитариро бо кишварҳои минтақа ва ҷаҳон фароҳам месозад.
АКС: Хадамоти матбуоти Президенти Ҷумҳурии Тоҷикистон