Душанбе, 09 май, – АИ «Корвон Иттилоот». Дар арафаи Рӯзи Ғалаба дар Донишгоҳи славянии Русияву Тоҷикистон (ДСРТ) аксияи байналмилалии «Лентаи Георгиевӣ» баргузор шуд. Ин иқдом ҳамчун рамзи хотира, миннатдорӣ ва эҳтиром ба қаҳрамонии насли Ғалабакунанда баргузор мегардад.
Тӯли беш аз даҳ сол аст, ки миллионҳо нафар дар саросари ҷаҳон лентаи сиёҳу норинҷиро ҳамчун нишонаи арҷгузорӣ ба собиқадорон, ҳимоятгарони Ватан ва ҳамаи онҳое, ки ба Ғалаба наздикӣ овардаанд, ба либоси худ мечаспонанд. Лентаи Георгиевӣ ба яке аз рамзҳои асосии Рӯзи Ғалаба табдил ёфта, наслҳоро дар атрофи ҳифзи хотираи таърихӣ ва арзишҳои маънавӣ муттаҳид месозад.
Субҳ дар Донишгоҳи славянии Русияву Тоҷикистон бо садои сурудҳои маъруфи солҳои ҷанг оғоз ёфт. Дар даромадгоҳи донишгоҳ устодон, кормандон ва донишҷӯёнро мусиқии ғалаба пешвоз гирифта, фазои ягонагӣ, ифтихор ва эҳтироми амиқ ба таърихро фароҳам овард.
Дар ҷараёни аксия муовини ректор оид ба корҳои тарбиявӣ Марина Русакова, муовини декани факултети филологияи рус, журналистика ва медиатехнология Полина Кузмичёва ва донишҷӯёни волонтёр ба иштирокдорон лентаҳои Георгиевиро тақдим намуда, онҳоро бо фарорасии ҷашн табрик гуфтанд.
Ба муносибати санаи хотиравӣ дар донишгоҳ открыткаҳои мавзӯӣ, номаҳои ҷангии шакли секунҷа бо портретҳои Қаҳрамонони Иттиҳоди Шӯравӣ аз Тоҷикистон ва маводи иттилоотӣ дар бораи рӯйдодҳои асосии Ҷанги Бузурги Ватанӣ омода гардид.
Иштироки хос таваҷҷуҳи ҳозиринро буклети ҷашнии «Қаҳрамонии тоҷикон дар солҳои Ҷанги Бузурги Ватанӣ» ҷалб намуд, ки аз ҷониби Маркази ҳамоҳангсозии фаъолият оид ба ташаккули мавқеи фаъоли шаҳрвандӣ, пешгирии ифротгароӣ ва таҳкими ҳамдигарфаҳмии миллатҳо дар ДСРТ таҳия шудааст. Дар он дар бораи қаҳрамонии тоҷикон дар фронт ва ақибгоҳ, саҳми ҷумҳурӣ дар Ғалаба, эвакуатсияи корхонаҳо ва муассисаҳои фарҳангӣ, инчунин кӯмак ба ҷабҳа маълумот оварда шудааст.
Аксияи «Лентаи Георгиевӣ» дар ДСРТ бори дигар хотиррасон кард, ки Рӯзи Ғалаба танҳо як санаи таърихӣ нест, балки пайванди зиндаи наслҳост, ки мардумро дар атрофи хотираи шуҷоат, истодагарӣ ва қаҳрамонии абадӣ муттаҳид месозад.
АКС: Донишгоҳи славянии Русияву Тоҷикистон