Душанбе, 08 май, – АИ «Корвон Иттилоот». Аз 15 то 24 июн дар шаҳри Хуҷанд XI Форуми байналмилалии фарҳангӣ-маърифатии «Кӯдакони Иттиҳод» баргузор мешавад. Тавре аз хадамоти матбуоти Кумитаи иҷроияи ИДМ хабар доданд, ин форум бори аввал дар Тоҷикистон доир мегардад ва интихоби Хуҷанд аҳамияти рӯзафзуни ин шаҳрро ҳамчун маркази муҳими илмӣ ва фарҳангии минтақа таъкид мекунад.
Иқдоми баргузории форум дар Тоҷикистон ба Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ тааллуқ дорад. Ташкилкунандагони чорабинӣ Ассамблеяи байнипарламентии ИДМ ва Маҷлиси миллии Маҷлиси Олии Тоҷикистон мебошанд, бо дастгирии Фонди байнидавлатии ҳамкории башардӯстонаи давлатҳои иштирокдори Иттиҳод.
Форум ҳамчун фазои муколамаи зинда миёни хонандагони кишварҳои Иттиҳод тарҳрезӣ шудааст. Дар доираи он иштирокчиён бо таърих, фарҳанг ва анъанаҳои якдигар ошно мешаванд. Барнома презентатсияи расму ойинҳои миллӣ, намоишгоҳҳо, мастер-классҳо, мусобиқаҳои варзишӣ, бозиҳои зеҳнӣ, тренингҳои омӯзишӣ, озмунҳои мусиқӣ ва шабҳои фарҳангиро дар бар мегирад.
Барои Хуҷанд, ки дар домани зебои дарёи Сир ҷойгир буда, ҳамчун бузургтарин маркази илмӣ ва фарҳангии шимоли Тоҷикистон шинохта мешавад, ин форум на танҳо як рӯйдоди обрӯманд, балки фурсатест барои таҳкими робитаҳои башардӯстона ва муаррифии Тоҷикистон тавассути дипломатияи ҷавонон ва фазои омӯзишӣ.
Форуми «Кӯдакони Иттиҳод» бо ташаббуси Жогорку Кенеши Ҷумҳурии Қирғизистон баргузор мешавад. Аввалин форум соли 2013 дар Чолпон-Ато доир шуда буд. Минбаъд ҷуғрофияи баргузорӣ густариш ёфт: соли 2021 Санкт-Петербург, соли 2023 Ӯзбекистон ва соли 2025 Беларус мизбон буданд. Дар маҷмӯъ дар ин форум беш аз 800 хонанда иштирок кардаанд.
Акс: хадамоти матбуоти Кумитаи иҷроияи ИДМ.