Душанбе, 27 май, – АИ «Корвон Иттилоот». Паёми табрикии Президенти Ҷумҳурии Тоҷикистон Эмомалӣ Раҳмон ба муносибати Иди Қурбон танҳо як муроҷиати идона набуд, балки ёдоварии муҳим дар бораи масъулияти маънавӣ, иҷтимоӣ ва шаҳрвандии ҷомеа гардид. Дар маркази ин паём на танҳо арзишҳои динӣ, балки масъалаҳои ахлоқ, сарфаю сариштакорӣ, дастгирии ниёзмандон ва таҳкими ваҳдати миллӣ қарор дошт.

Эмомалӣ Раҳмон таъкид карданд, ки Иди Қурбон яке аз муҳимтарин ойинҳои дини мубини ислом буда, дӯстӣ, раҳмдилӣ ва эҳтиром ба калонсолонро тақвият мебахшад. Сарвари давлат хотиррасон намуданд, ки ин ид бояд замони анҷоми корҳои хайр бошад, на намоиши исрофкорӣ. Махсусан зикр шуд, ки қурбонӣ танҳо аз ҷониби афроде анҷом дода мешавад, ки имкони молиявӣ доранд, дар ҳоле ки барои шахсони камбизоат ин амал воҷиб нест.

Президенти кишвар ҳамчунин ба зарурати риояи камхарҷӣ ва меъёрҳои санитарӣ ишора карда, таъкид намуданд, ки набояд анъанаи динӣ ба рақобати исроф табдил ёбад. Ин мавқеъ бо қонуни амалкунандаи кишвар дар бораи танзими анъана ва ҷашну маросимҳо низ ҳамоҳанг аст, ки ҳадафи он ҳифзи буҷаи оилавӣ ва тарбияи фарҳанги истифодаи оқилонаи маблағҳост.

Дар паём инчунин ба заминаи васеътар ишора шуд: дар шароити бесуботии бозорҳои ҷаҳон, болоравии нархҳо ва норасоии маводи ғизоӣ шаҳрвандон бояд бештар меҳнат карда, заминро самаранок истифода баранд ва дар бораи амнияти озуқавории оила ва давлат андеша кунанд. Ба ин тартиб, паёми идона ба як ёдрасии муҳим табдил ёфт, ки имон, дониш, меҳнат ва масъулият бояд ҳамқадам бошанд.

Эмомалӣ Раҳмон ба нақши дониш ва маърифат низ таваҷҷуҳи хос зоҳир намуда, онҳоро пояи арзишҳои ҳақиқии динӣ ва ахлоқӣ номиданд. Дар остонаи 35-солагии Истиқлоли давлатӣ ин муроҷиат боз ҳам маънии давлатиро касб кард: ҳифзи сулҳ, субот ва дастовардҳои истиқлол танҳо тавассути созандагӣ, интизом ва ҳамбастагии ҷомеа имконпазир аст.

Акс: Хадамоти матбуоти Президенти Ҷумҳурии Тоҷикистон