Душанбе, 18 июл, – АИ «Корвон Иттилоот». Имзои созишнома миёни вазири саноат ва технологияҳои нави Ҷумҳурии Тоҷикистон Шералӣ Кабир ва вазири корҳои хориҷии Ҷумҳурии Мардумии Чин Ван И дар ҳошияи Конфронси ҷаҳонӣ оид ба зеҳни сунъӣ дар шаҳри Шанхай оғози марҳилаи нави ҳамкориҳои стратегии Тоҷикистону Чинро ифода мекунад.
Душанбе ва Пекин аз ҳамкориҳои анъанавӣ дар бахшҳои инфрасохтор ва истихроҷи захираҳо ба сатҳи интиқоли мустақими технологияҳои пешрафта мегузаранд.
Созишномаи мазкур заминаи ҳуқуқӣ ва технологиро барои татбиқи афзалиятҳои Барномаи миёнамуҳлати рушди Ҷумҳурии Тоҷикистон барои солҳои 2026–2030, ки аз ҷониби Вазорати рушди иқтисод ва савдо дар Ню-Йорк муаррифӣ гардид, фароҳам месозад. Рақамикунонии саноат ва ҷорӣ намудани зеҳни сунъӣ бо дастгирии Чин бояд ба омили асосии суръатбахшии саноатикунонии кишвар табдил ёбад.
Тоҷикистон бо ҷалби яке аз пешсафони ҷаҳонии технология қадами муҳим дар самти ташаккули иқтисоди рақамии оянда мегузорад. Тавре маркази матбуоти Вазорати саноат ва технологияҳои нави Ҷумҳурии Тоҷикистон хабар медиҳад, дар шаҳри Шанхай дар доираи Конфронси ҷаҳонӣ оид ба зеҳни сунъӣ байни вазири саноат ва технологияҳои нави Ҷумҳурии Тоҷикистон Шералӣ Кабир ва вазири корҳои хориҷии Ҷумҳурии Мардумии Чин Ван И созишномаи стратегӣ ба имзо расид.
Ин ҳуҷҷат ҳамкории дарозмуддати ду кишварро дар самтҳои технологияҳои баланд, навоварӣ ва рақамикунонии бахши воқеии иқтисод расман таҳким мебахшад.
Дар ҷараёни мулоқоти дуҷониба ҷонибҳо «харитаи роҳ»-и ҳамгироии қарорҳои муосири IT-и Чинро ба маҷмааи саноатии Тоҷикистон мавриди баррасии муфассал қарор доданд.
Созишномаи имзошуда таҳия ва ҷорӣ намудани системаҳои зеҳни сунъӣ, таъсиси озмоишгоҳҳои муштараки илмӣ-технологӣ ва автоматикунонии амиқи равандҳои истеҳсолиро дар назар дорад. Роҳбарони ду ниҳод таъкид намуданд, ки густариши ҳамкорӣ бо шарикони сатҳи ҷаҳонӣ ба Тоҷикистон имкон медиҳад гузариш ба Инқилоби чоруми саноатӣ (Индустрия 4.0)-ро бо суръати бештар амалӣ намояд.
Барои таҳлилгарон равшан аст, ки созишномаи Шералӣ Кабир ва Ван И посухи мустақим ба талаботи замон ва ҳадафҳои нави стратегии кишвар мебошад.
Чанде пеш бахши макроиқтисоди агентии мо суханронии вазири рушди иқтисод ва савдои Ҷумҳурии Тоҷикистонро дар Ню-Йорк таҳлил намуда буд, ки дар он рақамикунонӣ ва саноатикунонии босуръат ҳамчун самтҳои калидии Барномаи миёнамуҳлати рушди солҳои 2026–2030 муайян гардиданд.
Имзои Ван И зери ин созишнома нишон медиҳад, ки Пекин омода аст ба Душанбе на танҳо дастгирии сиёсӣ, балки мусоидати фарогири технологӣ низ расонад ва Тоҷикистонро ба яке аз лоиҳаҳои намунавии «Роҳи абрешими рақамӣ» дар Осиёи Марказӣ табдил диҳад.
АКС: Вазорати саноат ва технологияҳои нави Ҷумҳурии Тоҷикистон