Душанбе, 20 май, – АИ «Корвон Иттилоот». Шоми 17 майи соли 2026 дар шаҳри Хуҷанд чорабинии тантанавӣ ба муносибати 100-солагии Осорхонаи таърихии вилояти Суғд баргузор гардид. Барномаи идона дар Театри давлатии мусиқӣ-драмавии ба номи Камоли Хуҷандӣ доир шуда, намояндагони сохторҳои давлатӣ, фарҳанг, илм ва корпуси дипломатиро гирди ҳам овард.

Дар чорабинӣ намояндагони мақомоти сиёсиву ҷамъиятӣ, аз ҷумла роҳбарияти кумитаи иҷроияи Ҳизби Халқии Демократии Тоҷикистон дар вилояти Суғд, роҳбарияти шаҳри Хуҷанд, масъулони соҳаи фарҳанг, созмонҳои иттифоқи касаба, инчунин консули генералии Федератсияи Русия дар шаҳри Хуҷанд Сергей Ланкин иштирок карданд. Ҳамзамон олимон, аҳли фарҳанг, омӯзгорон, донишҷӯён ва намояндагони воситаҳои ахбори омма низ ҳузур доштанд.

Қисмати расмии чорабинӣ бо сухани ифтитоҳии ровӣ оғоз ёфт, ки дар он таърихи таъсиси осорхона, нақши он дар ҳифзи мероси фарҳангӣ ва саҳмаш дар муаррифии таъриху тамаддуни халқи тоҷик матраҳ гардид.

Сипас филми мустанад оид ба ҷамъоварии ашёҳои нодири таърихӣ намоиш дода шуд. Дар филм ба фаъолияти ҳунарманд ва ҷамъоварандаи осори қадим Ҳоҷӣ Антиқа таваҷҷуҳи махсус зоҳир гардид, ки саҳми ӯ дар ҳифзи бозёфтҳои нодир ва рушди кори осорхонавӣ хеле муҳим арзёбӣ шуд.

Бо сухани табрикотӣ раиси кумитаи иҷроияи ҲХДТ дар вилояти Суғд Ҷаҳонгир Салимзода баромад намуда, ҳайати кормандони осорхонаро бо ҷашни 100-солагӣ табрик гуфт ва нақши онро дар ҳифзи хотираи таърихӣ ва мероси фарҳангӣ баланд арзёбӣ кард.

Дар идомаи чорабинӣ ба як қатор кормандон ва фаъолон барои саҳмгузорӣ дар рушди осорхона ва тарғиби таърихи миллӣ Сипосномаҳо ва туҳфаҳои хотиравӣ супорида шуданд.

Ҳамчунин намояндагони соҳаҳои фарҳанг ва иттифоқҳои касаба бо суханронии табрикотӣ баромад намуда, аҳамияти осорхонаро ҳамчун маркази муҳими илмӣ ва маърифатӣ таъкид карданд.

Бахши хотимавии чорабинӣ бо барномаи пурғановати консертии ҳунармандони вилоят ҷамъбаст гардид. Сурудҳо ва рақсҳои ҷолиб ба чорабинӣ руҳу таровати идона бахшиданд.

Таҷлили 100-солагии Осорхонаи таърихии вилояти Суғд на танҳо як чорабинии фарҳангӣ, балки тасдиқи ҷойгоҳи устувори он ҳамчун нигаҳдорандаи хотираи таърихии минтақа гардид.

АКС: Кумитаи иҷроияи Ҳизби Халқии Демократии Тоҷикистон дар шаҳри Хуҷанд