Душанбе, 30 май, – АИ «Корвон Иттилоот». Ҳалли пурраи масъалаҳои марзӣ миёни Тоҷикистон ва Қирғизистон, инчунин густариши ҳамкориҳои минтақавии кишварҳои Осиёи Марказӣ мавзӯи асосии нишасти матбуотӣ гардид, ки дар Вашингтон дар Маркази Авруосиёии Шӯрои Атлантик баргузор шуд.

Чорабинӣ бо ташаббуси сафоратҳои Тоҷикистон, Қирғизистон, Ӯзбекистон ва Маркази Авруосиёии Шӯрои Атлантик ташкил гардида, меҳвари асосии муҳокимаҳо ба анҷоми таърихии баҳсҳои тӯлонии марзӣ, аҳамияти Эъломияи Хуҷанд оид ба дӯстии абадӣ ва дурнамои ҳамкориҳои минтақавӣ дар Осиёи Марказӣ бахшида шуд.

Тавре Сафорати Ҷумҳурии Тоҷикистон дар Иёлоти Муттаҳидаи Амрико хабар медиҳад, Сафири Фавқулода ва Мухтори Ҷумҳурии Тоҷикистон дар ИМА Завқӣ Завқизода таъкид намуд, ки ҳалли ниҳоии масъалаҳои сарҳадӣ миёни Тоҷикистон ва Қирғизистон ба шарофати иродаи қавии сиёсии Президенти Ҷумҳурии Тоҷикистон Эмомалӣ Раҳмон ва Президенти Ҷумҳурии Қирғизистон Садир Жапаров имконпазир гардид.

Ба гуфтаи дипломат, расидан ба созишҳои ниҳоӣ оид ба сарҳад на танҳо рӯйдоди муҳими таърихӣ барои ду кишвар, балки намунаи нодири ҳалли осоиштаи баҳсҳои мураккаби ҳудудӣ дар амалияи муосири байналмилалӣ мебошад.

Дар ҷараёни нишасти матбуотӣ ба аҳамияти таърихии Эъломияи Хуҷанд оид ба дӯстии абадӣ, ки 31 марти соли 2025 ба имзо расид, инчунин Созишномаи байни Тоҷикистон, Қирғизистон ва Ӯзбекистон оид ба нуқтаи пайвасти сарҳадҳои давлатии се кишвар таваҷҷуҳи махсус зоҳир гардид. Коршиносон ин санадҳоро рамзи гузариши Осиёи Марказӣ аз давраи ихтилофҳои марзӣ ба марҳилаи нави эътимод ва ҳамкории минтақавӣ арзёбӣ мекунанд.

Ба гуфтаи таҳлилгарон, солҳои охир Осиёи Марказӣ тадриҷан ба фазои ҳамкориҳои наздики сиёсӣ ва иқтисодӣ табдил меёбад. Тақвияти муколама миёни кишварҳои минтақа барои татбиқи лоиҳаҳои муштараки инфрасохторӣ, нақлиётӣ ва энергетикӣ, инчунин таҳкими амнияти минтақавӣ заминаҳои нав фароҳам меорад.

Дар доираи чорабинӣ ҷониби Тоҷикистон инчунин ташаббусҳои байналмилалии ҷумҳуриро дар самти дипломатияи обу иқлим муаррифӣ намуд. Ба иштирокчиён дар бораи иқдомҳои ҷаҳонии Тоҷикистон вобаста ба масъалаҳои об ва тағйирёбии иқлим маълумот пешниҳод гардид, ки солҳои охир ба яке аз самтҳои асосии сиёсати хориҷии Душанбе табдил ёфтаанд.

Ҳамзамон сафири Тоҷикистон ба саволҳои иштирокчиён оид ба ҳамкории кишварҳои Осиёи Марказӣ дар бахши захираҳои обиву энергетикӣ, сохтмони Неругоҳи барқи обии Роғун, ҳамгироии нақлиётиву логистикӣ ва дурнамои ҳамкориҳои минтақавӣ посух дод.

Ба назари коршиносон, баррасии Эъломияи Хуҷанд дар яке аз марказҳои бонуфузи таҳлилии Иёлоти Муттаҳида аз афзоиши таваҷҷуҳи байналмилалӣ ба равандҳои тағйироти минтақавӣ дар Осиёи Марказӣ шаҳодат медиҳад. Дар пасманзари нооромии геополитикии ҷаҳон, минтақа бештар ҳамчун фазои муколамаи стратегӣ, пайванди транзитӣ ва тавозуни дипломатӣ арзёбӣ мешавад.

Акс: Сафорати Ҷумҳурии Тоҷикистон дар Иёлоти Муттаҳидаи Амрико