Душанбе, 12 август, – АИ «Корвон Иттилоот».  Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон зимни сафари корӣ ба шаҳри Ҳисор боғи нави «Дуои модар»-ро, ки дар маҳаллаи Камоли Хуҷандии шаҳр ҷойгир аст, мавриди истифода қарор дод.

Иншооти нави шаҳрӣ ҳамчун бахши муҳими корҳои ободониву созандагӣ ба истифода дода шуда, барои фароҳам овардани шароити мусоид ҷиҳати истироҳату фароғати сокинон пешбинӣ гардидааст.

Корҳои сохтмонӣ дар ин мавзеъ моҳи майи соли 2026 оғоз гардида, дар муҳлати кӯтоҳ бо истифода аз усулҳои муосири сохтмон ва ободонӣ ба анҷом расонида шуданд. Масоҳати умумии боғ 0,40 гектарро ташкил медиҳад. Ҳангоми иҷрои корҳои сохтмонӣ ва ободонӣ 27 нафар сокини маҳаллӣ бо ҷойи кори муваққатӣ таъмин гардиданд, ки ин яке аз натиҷаҳои иҷтимоиву иқтисодии татбиқи лоиҳа ба ҳисоб меравад.

Ҳудуди боғ бо дарназардошти талаботи муосир ба муҳити ҷамъиятии шаҳрӣ обод карда шудааст. Дар ин ҷо гулҳои рангоранг, дарахтони сояафкан ва намудҳои гуногуни растаниҳои ороишӣ шинонида шудаанд. Низоми равшанидиҳии боғ дар вақти шомгоҳӣ ба муҳити он ҷолибияти бештар бахшида, барои сайругашт ва истироҳати сокинон шароити мусоид фароҳам меорад.

Дар маркази боғ муҷассамаи модар гузошта шудааст. Ин унсури меъмориву бадеӣ ба иншооти нав на танҳо намуди зоҳирии хос мебахшад, балки мазмуни амиқи рамзӣ низ дорад.

Интихоби номи «Дуои модар» низ маънои хос дорад. Дар фарҳанги тоҷикӣ симои модар бо мафҳумҳои муҳаббат, ғамхорӣ, тарбия, ваҳдати оила ва хиради зиндагӣ пайванди ногусастанӣ дорад. Модар нахустин омӯзгори фарзанд, тарбиятгар ва роҳнамои ӯ дар роҳи зиндагӣ ба шумор меравад.

Зимни шиносоӣ бо боғи «Дуои модар» Пешвои миллат муҳтарам Эмомалӣ Раҳмон ба масъалаи ҳифзи мақоми модар ва эҳтироми ӯ дар ҷомеа таваҷҷуҳи махсус зоҳир намуданд. Таъкид гардид, ки модар шахсияти бузург ва муқаддас буда, эҳтиром ва ғамхорӣ нисбат ба ӯ вазифаи фарзандии ҳар як инсон мебошад.

Дар ин маврид вазифаи амалии боғ — макони истироҳат, сайругашт ва муоширати сокинон — бо паёми рамзӣ пайваст шудааст. Тавассути симои модар фазои ҷамъиятӣ ба як василаи тарғиби арзишҳои суннатӣ, эҳтироми насли калонсол ва таҳкими арзишҳои оилавӣ табдил меёбад.

Акс: Хадамоти матбуоти Президенти Ҷумҳурии Тоҷикистон