Душанбе, 22 июн, – АИ «Корвон Иттилоот». Дар пойтахти Тоҷикистон 12-умин Рӯзи байналмилалии йога бо иштироки намояндагони мақомоти давлатӣ, ҳайати дипломатӣ, варзишгарон ва сокинони шаҳр таҷлил гардид. Чорабинӣ ба тарғиби тарзи ҳаёти солим, рушди маърифати ҷисмонӣ ва таҳкими ҳамкориҳои фарҳангӣ бахшида шуд.

Маросим субҳи имрӯз дар назди шаршараи маҷмааи «Наврӯзгоҳ» баргузор шуда, бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Сафорати Ҷумҳурии Ҳиндустон ва Мақомоти иҷроияи ҳокимияти давлатии шаҳри Душанбе роҳандозӣ гардид.

Иштирокчиён маҷмӯи машқҳои йогаро иҷро намуда, бо арзишҳо ва фалсафаи ин таҷрибаи қадима ошно шуданд. Имрӯз йога дар ҷаҳон на танҳо ҳамчун маҷмӯи машқҳои ҷисмонӣ, балки ҳамчун василаи таҳкими саломатӣ, нигоҳдории тавозуни равонӣ ва рушди фарҳанги зиндагии солим арзёбӣ мешавад.

Ҳамасола 21 июн дар саросари ҷаҳон ҳамчун Рӯзи байналмилалии йога таҷлил мегардад. Қарори таъсиси ин рӯз моҳи декабри соли 2014 дар ҷаласаи 69-уми Маҷмааи умумии Созмони Милали Муттаҳид бо пешниҳоди Сарвазири Ҳиндустон Нарендра Модӣ қабул гардида, аз ҷониби 177 кишвари ҷаҳон ҷонибдорӣ шудааст.

Дар солҳои охир йога ба яке аз падидаҳои фарогири ҷаҳонӣ табдил ёфтааст. Миллионҳо нафар дар кишварҳои гуногун онро ҳамчун воситаи нигоҳдории саломатӣ, пешгирии бемориҳо ва баланд бардоштани сифати зиндагӣ истифода мебаранд. Маҳз ҳамин тамоюл боиси таваҷҷуҳи рӯзафзуни ҷомеаи ҷаҳонӣ ба ин таҷриба гардидааст.

Баргузории Рӯзи байналмилалии йога дар Душанбе бозгӯи рушди ҳамкориҳои фарҳангиву гуманитарии Тоҷикистону Ҳиндустон мебошад. Чунин чорабиниҳо ба густариши муколамаи байнифарҳангӣ, таҳкими робитаҳои мардумӣ ва тарғиби арзишҳои зиндагии солим мусоидат менамоянд.

Рамзист, ки ин ҷашн дар рӯзи офтобистонии сол — 21 июн баргузор мешавад. Дар бисёре аз фарҳангҳои ҷаҳон ин рӯз ҳамчун рамзи таҷдид, ҳамоҳангӣ ва ваҳдати инсон бо табиат пазируфта шудааст. Маҳз ҳамин арзишҳо дар меҳвари фалсафаи йога қарор доранд, ки инсонро қисми ҷудонашавандаи табиат ва ҷомеа медонад.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон