Душанбе, 14 апрел, – АИ «Корвон Иттилоот». 9–10 апрел дар Тоҷикистон бори аввал имтиҳонҳои тахассусӣ барои ба даст овардани ҳуқуқи пӯшидани кулоҳи краповӣ баргузор шуданд — рамзе, ки сатҳи олии омодагӣ ва ҷасорати ҷангиёни нерӯҳои махсусро ифода мекунад. Ин рӯйдод барои низоми Қӯшунҳои дохилии ВКД аҳамияти калидӣ дошта, меъёри нави талаботи касбиро муайян намуд.

Озмоишҳо таҳти роҳбарии Вазири корҳои дохилии Ҷумҳурии Тоҷикистон генерал-полковник Рамазон Раҳимзода ва фармондеҳи Қӯшунҳои дохилӣ генерал-майор Суҳроб Рауфзода — ташаббускор ва муаллифи ғояи лоиҳа баргузор гардиданд. Аз зиёда аз 270 довталаб танҳо 150 нафар аз марҳилаи интихоботи пешакӣ гузашта, ба қисми асосии санҷиш роҳ ёфтанд.

Барномаи имтиҳонҳо ба шароити воқеии ҷангӣ наздик гардонида шуда буд. Иштирокчиён марши 10-километраро дар минтақаи кӯҳӣ бо таҷҳизоти пурра тай намуда, монеаҳоро паси сар карданд, дар ҳолати хастагии шадид тирпарронӣ анҷом доданд ва дар марҳилаи ниҳоӣ — муҳорибаи тан ба тан иштирок намуданд. Маҳз ҳамин марҳила ҳалкунанда буд: пас аз сарбории шадид ҷангиён на танҳо қувва, балки ирода ва устувории худро нишон доданд.

Дар натиҷа танҳо 27 нафар ҳуқуқи пӯшидани кулоҳи краповиро ба даст оварданд. «Ин танҳо ҷузъи либос нест, балки нишонаи касбияти воқеист», — таъкид кард Суҳроб Раҳмонзода ва афзуд, ки натиҷаҳои бадастомада замина барои рушди минбаъдаи низоми омодасозӣ хоҳанд шуд.

Барои таъмини шаффофият ба имтиҳонҳо нозирон аз ВКД Ҷумҳурии Беларус даъват шуданд. Онҳо сатҳи ташкилот, интизом ва душвории шароитро баланд арзёбӣ намуда, махсусан релефи кӯҳӣ ва омилҳои обу ҳаворо қайд карданд. Ба гуфтаи онҳо, формати санҷишҳо ба меъёрҳои байналмилалӣ ҷавобгӯ буда, имкон медиҳад омодагии ҷангиён ба таври воқеӣ баҳогузорӣ шавад.

Баргузории имтиҳонҳо ба 33-солагии таъсиси Қӯшунҳои дохилӣ ва Рӯзи Қӯшунҳои дохилии ВКД Тоҷикистон, ки ҳар сол 10 апрел таҷлил мегардад, бахшида шуд. Эълон шудааст, ки минбаъд чунин санҷишҳо соле ду маротиба — баҳор ва тирамоҳ — баргузор шуда, анъана ва низоми нави интихоби нерӯҳои махсусро шакл медиҳанд.

Чорабиниҳо бо маҷлиси тантанавӣ дар Театри давлатии академии опера ва балети ба номи Садриддин Айнӣ дар Душанбе анҷом ёфтанд. Вазири корҳои дохилӣ генерал-полковник Рамазон Раҳимзода таъкид кард, ки Қӯшунҳои дохилӣ «сипари боэътимоди давлат» боқӣ мемонанд ва соҳибони кулоҳи краповӣ рамзи марҳилаи нави рушди сохторҳои қудратии кишвар мебошанд.

Акс: Раёсати Қӯшунҳои дохилии ВКД Ҷумҳурии Тоҷикистон