Душанбе, 31 июл, – АИ «Корвон Иттилоот».Дар меҳмонхонаи «Ҳаят Реҷенсӣ» Форуми байналмилалӣ оид ба кори иҷтимоӣ ва хизматрасониҳои иҷтимоӣ таҳти унвони «Кори иҷтимоӣ дар Тоҷикистон ва рушди он дар давраи истиқлолият» ба кори худ оғоз намуд.

Ташаббускори чорабинӣ Ҳукумати Ҷумҳурии Тоҷикистон буда, форум аз ҷониби Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо дастгирии ЮНИСЕФ баргузор мешавад.

Дар кори форум намояндагони мақомоти давлатӣ, созмонҳои байналмилалӣ, муассисаҳои илмӣ ва шарикони рушд аз Тоҷикистон, Русия, Қазоқистон, Қирғизистон, Туркманистон, Ӯзбекистон, Австрия, Ҷумҳурии Исломии Эрон ва Ҷопон иштирок доранд.

Дар маросими ифтитоҳ муовини Сарвазири Ҷумҳурии Тоҷикистон Дилрабо Мансурӣ, вазири тандурустӣ ва ҳифзи иҷтимоии аҳолӣ Ҷамолиддин Абдуллозода, иҷрокунандаи вазифаи Намояндаи ЮНИСЕФ дар Тоҷикистон Эри Двиведӣ, намояндагони муассисаҳои Созмони Милали Муттаҳид, созмонҳои байналмилалӣ, ҷомеаи шаҳрвандӣ ва муассисаҳои илмӣ иштирок намуданд.

Зимни суханрониҳо таъкид гардид, ки Тоҷикистон дар солҳои истиқлолият тавассути ислоҳоти пайгирона ва сармоягузорӣ ба рушди соҳаи ҳифзи иҷтимоӣ ба натиҷаҳои назаррас ноил гардидааст. Дар марҳилаи минбаъда таваҷҷуҳи асосӣ ба омодасозии мутахассисони баландихтисос, таҳкими ҳамкории байнисоҳаӣ миёни тандурустӣ, ҳифзи иҷтимоӣ ва дигар сохторҳо, инчунин расонидани кумаки ҳамгиро ва саривақтӣ ба кӯдакон, оилаҳо ва гурӯҳҳои осебпазир равона хоҳад шуд.

Эри Двиведӣ зимни суханронии худ нақши калидии кормандони иҷтимоиро дар пешгирии зӯроварӣ, дастгирии оилаҳо, ҳифзи ҳуқуқи кӯдакон ва таъмини дастрасии гурӯҳҳои осебпазир ба хизматрасониҳои иҷтимоӣ махсус таъкид намуд. Ба гуфтаи ӯ, сармоягузорӣ ба рушди кори иҷтимоӣ ҳамзамон сармоягузорӣ ба таҳкими институтҳои давлатӣ ва беҳтар намудани некӯаҳволии ҳар як кӯдак мебошад.

Иштирокчиён зикр карданд, ки кормандони иҷтимоии касбӣ дар пешгирии ҷудошавии кӯдак аз оила, ҳалли ҳолатҳои зӯроварӣ, дастгирии кӯдакони дорои маъюбият ва дигар гурӯҳҳои осебпазир, инчунин таҳкими устувории ҷомеа нақши муҳим доранд.

Дар доираи форум шаш нишасти панелӣ баргузор мегардад, ки ба масъалаҳои рушди ҳамкориҳои минтақавӣ, ҷорӣ намудани низоми ҳамгирошудаи идоракунии парвандаҳо (кейс-менеҷмент), рақамикунонии хизматрасониҳои иҷтимоӣ ва такмили таҳсилоти касбии кормандони иҷтимоӣ бахшида шудаанд.

Дар анҷоми форум қабули Эъломияи ҷамъбастӣ дар назар аст, ки самтҳои афзалиятноки рушди минбаъдаи кори иҷтимоӣ ва хизматрасониҳои иҷтимоиро дар Тоҷикистон ва кишварҳои минтақа муайян хоҳад кард. Ҳамчунин барои кормандони иҷтимоӣ мастер-класси амалӣ оид ба усулҳои муосири кейс-менеҷмент ва ҳифзи ҳуқуқи кӯдак баргузор мегардад.

Баргузории форуми байналмилалӣ нишон медиҳад, ки низоми ҳифзи иҷтимоии Тоҷикистон ба марҳилаи нави рушд ворид мешавад, ки дар он сифати хизматрасонӣ, омодасозии кадрҳо ва истифодаи усулҳои муосири идоракунӣ аҳамияти калидӣ доранд. Институти кори иҷтимоӣ имрӯз ба яке аз унсурҳои муҳими сиёсати давлатӣ табдил ёфта, барои пешгирии хатарҳои иҷтимоӣ, ҳифзи ҳуқуқи кӯдакон ва дастгирии оилаҳои осебпазир нақши муассир мебозад.

Иштироки фаъоли ЮНИСЕФ ва дигар шарикони байналмилалӣ имконият медиҳад, ки таҷрибаи пешрафтаи ҷаҳонӣ, технологияҳои рақамӣ ва стандартҳои нави хизматрасонии иҷтимоӣ дар Тоҷикистон татбиқ гарданд. Қабули Эъломияи ҷамъбастӣ метавонад барои рушди минбаъдаи низоми ҳифзи иҷтимоӣ, таҳкими ҳамкориҳои минтақавӣ ва баланд бардоштани самаранокии хизматрасониҳои иҷтимоӣ дар тамоми минтақа такони нав бахшад.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон / ЮНИСЕФ