Душанбе, 18 февраля 2026г. — ИА Караван Инфо. 17 феврали соли 2026 дар Российско-Таджикский (Славянский) университет бахшида ба иди Масленица — яке аз ҷашнҳои пуршукуҳу рамзии анъанаҳои мардумии славянӣ — чорабинии тантанавӣ баргузор гардид. Дар ин ҷашн роҳбарияти донишгоҳ, ҳайати профессорону омӯзгорон, кормандон, донишҷӯён ва меҳмонони даъватшуда иштирок намуданд.

Барномаи идона дар шакли як чорабинии фарҳангии фарогир доир гардида, ҳар як факултет мизи идонаи худро бо ороиши мавзӯӣ ва таомҳои суннатии Масленица муаррифӣ кард. Ба ҳифзи анъанаҳо таваҷҷуҳи махсус зоҳир гардид: блину шириниҳои гуногун, таомҳои миллӣ ва унсурҳои ороишии мардумӣ фазои гарму самимии ҷашни баҳориро ба вуҷуд оварданд. Ҳайатҳои факултетҳо бо эҷодкорӣ ва завқи баланд мизҳои идонаро оро дода, рамзҳои видоъ бо зимистон ва истиқболи фасли баҳорро таҷассум намуданд.

Қисмати тантанавии чорабинӣ дар толори фарҳангии донишгоҳ бо барномаи консертӣ идома ёфт. Донишҷӯён барномаҳои вокалӣ, рақсӣ, саҳначаҳои театрӣ ва иҷрои асарҳои мусиқиро пешниҳод намуданд, ки анъанаҳои фарҳангии ин ҷашни мардумиро инъикос мекарданд. Ҳар як баромад бо истиқболи гарми ҳозирин ҳамроҳ гардида, фазои ҳамдиливу ҳамбастагиро тақвият бахшид.

Ташкилкунандагон таъкид намуданд, ки баргузории чунин чорабиниҳо танҳо аҳамияти фарҳангӣ ва фароғатӣ надошта, балки рисолати тарбиявӣ низ иҷро мекунанд. Масленица дар муҳити донишгоҳӣ ба минбари муколамаи байнифарҳангӣ, табодули анъанаҳо ва таҳкими эҳтироми мутақобил табдил меёбад.

Дар фазои бисёрмиллатии академӣ чунин ҷашнҳо ба ҳифзи мероси таърихию фарҳангӣ, рушди таҳаммулпазирӣ ва ташаккули фарҳанги устувори корпоративии донишгоҳ мусоидат менамоянд. Таҷлили Масленица дар деворҳои донишгоҳ бори дигар собит сохт, ки анъанаҳои мардумӣ метавонанд новобаста аз миллат ва мақоми иҷтимоӣ мардумро муттаҳид намоянд.

АКС: Бахтовар Қудратуллозода