Душанбе, 22 октябр, – АИ «Корвон Иттилоот». Президенти Ӯзбекистон Шавкат Мирзиёев пешниҳод кард, ки низоми гузариш аз сарҳад бо Тоҷикистон тавассути ID-корт зудтар ҷорӣ карда шавад.

Ин изҳоротро ӯ 19 октябр дар вохӯрӣ бо Вазири корҳои хориҷии Тоҷикистон Сироҷиддин Муҳриддин, ки барои иштирок дар вохӯрии сарони вазоратҳои корҳои хориҷии кишварҳои Осиёи Марказӣ ва ИМА дар формати «С5+1» ба Ӯзбекистон омада буд, баён кард. Дар ин бора President.uz хабар медиҳад.

Зарурати чунин қарорро Мирзиёев бо афзоиши боркашонӣ байни ду кишвар шарҳ дод. Ба гуфтаи ӯ, зиёдшавии ҳаҷми он тақозо мекунад, ки кор рӯи тартиби нави гузариш аз сарҳад тезонида шавад.

Тарафҳо таҳкими муносибатҳои дӯстона ва иттифоқӣ ва иҷрои созишҳоеро, ки дар сатҳи баланд ба даст омадаанд, баррасӣ карданд. Онҳо афзоиши савдои мутақобила ва боркашониро қайд намуданд. Лоиҳаҳои муштарак дар энергетика, саноат, кишоварзӣ ва соҳаи об дар марҳилаи фаъол қарор доранд.

Ҳамчунин рушди робитаҳои фарҳангию башардӯстона, табодули таълимӣ ва сайёҳӣ ва масъалаҳои мубрами рӯзномаи минтақавӣ баррасӣ шуданд.

Мирзиёев таъкид кард, ки муносибатҳо бо Тоҷикистон аз рӯзҳои аввали раисиҷумҳуриаш барои ӯ аҳаммияти махсус доранд ва кори зиёди кишварҳоро дар таҳкими робитаҳо қайд намуд. «Дар Ӯзбекистон ва Тоҷикистон қариб оилае нест, ки бо ҳамдигар бо риштаи хешутаборӣ пайваст набошад», гуфт ӯ ва замонеро ба ёд овард, ки сарҳадҳо баста буданд ва савдо ва муносибатҳо камтар наздик буданд.

Акс: https://president.uz/