Душанбе, 19 ноябр, – АИ Корвон Иттилоот. 18 ноябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо мақсади ифтитоҳи иншооти таъиноти гуногун, шиносоӣ бо зиндагии сокинон ва ҷараёни корҳои созандагӣ ба вилояти Суғд сафар намуданд.

Дар фурудгоҳи байналмилалии шаҳри Хуҷанд Сарвари давлатро раиси вилояти Суғд Раҷаб Аҳмадзода ва дигар масъулони давлатӣ самимона истиқбол гирифтанд.

Сафари навбатии кории Пешвои миллат ба Suғд идомаи сиёсати пайвастаи роҳбарияти кишвар дар самти рушди минтақавӣ, тақвияти инфрасохтори иҷтимоӣ ва беҳсозии шароити зиндагии аҳолӣ мебошад. Барномаи корӣ боздиди иншооти навбунёд, мавриди истифода қароргирифта ва сохтмони ҷараёндоштаро дарбар мегирад.

Бино ба маълумоти мақомоти иҷроия, дар доираи омодагиҳо ба таҷлили 35-солагии Истиқлоли давлатии Ҷумҳурии Тоҷикистон дар вилояти Суғд бо дастуру ҳидоятҳои Пешвои миллат зиёда аз 12 ҳазор иншоот баъди сохтмон, навсозӣ ва азнавтаъмиркунӣ ба истифода супорида шудаанд.

Ҳамзамон, то моҳи сентябри соли 2026 бунёди 2 ҳазор иншооти дигар ба нақша гирифта шудааст, ки ин иқдом яке аз бузургтарин барномаҳои инфрасохторӣ дар таърихи давраи истиқлолияти кишвар ба шумор меравад. Татбиқи чунин лоиҳаҳо дар баробари таъсиси ҷойҳои нави корӣ, сатҳи зиндагии мардумро беҳтар намуда, имкониятҳои сармоягузории минтақаро низ густариш медиҳад.

Сафари кории Президенти мамлакат идома ёфта, дар доираи он муҳтарам Эмомалӣ Раҳмон як қатор мавзеъҳо ва иншоотро мавриди назар қарор дода, барои рушди минбаъдаи вилоят дастурҳои иловагӣ хоҳанд дод.

АКС: Хадамоти матбуоти Президенти Ҷумҳурии Тоҷикистон