Душанбе, 16 май, – АИ «Корвон Иттилоот». Дар Панҷакент Рӯзи байналмилалии оила имсол низ танҳо як санаи тақвимӣ набуда, балки ба мавзӯи муҳими нақши арзишҳои оилавӣ, пайванди наслҳо ва тарбияи ҷавонон дар рӯҳияи суннатҳои миллӣ ва ватандӯстӣ табдил ёфт.

Чорабинии тантанавӣ бахшида ба ин рӯз дар толори тарабхонаи «Дӯстӣ» баргузор гардид, ки дар он оилаҳои намунавии шаҳр — онҳое, ки дар тарбияи фарзандон, риояи масъулиятҳои оилавӣ ва ҳифзи суннатҳои хонаводагӣ намунаи ибрат мебошанд, гирди дастархони идона ҷамъ омаданд.

Ба чорабинӣ ороиши махсусро дастурхонҳои идона бахшиданд, ки бо маҳсулоти ҳунарҳои дастии худи аъзои оилаҳо зиннат дода шуда буданд. Ин рамзи гармии хонадон, меҳнатдӯстӣ ва эҳтиром ба анъанаҳо маҳсуб меёбад, ки дар ҷомеаи тоҷик аз қадим асоси оилаи мустаҳкам дониста мешаванд.

Дар ҷараёни чорабинӣ таъкид гардид, ки Эмомали Рахмон борҳо нақши муҳими оила ва падару модарро дар ташаккули ҷомеаи оянда махсус арзёбӣ кардааст. Пешвои миллат дар суханрониҳои худ пайваста таъкид менамояд, ки маҳз оила нахустин мактаби ахлоқ, ватандӯстӣ ва масъулияти шаҳрвандӣ мебошад.

Аз номи раиси шаҳр Абдухолиқ Холиқзода оилаҳоро ба муносибати Рӯзи байналмилалии оила муовини раиси шаҳр Мурод Шукурзода табрик намуд. Ӯ зимни суханронӣ аҳамияти институти оиларо барои устувории ҷомеа, ҳифзи арзишҳои фарҳангӣ ва тарбияи насли солиму созанда муҳим арзёбӣ кард.

Дар анҷоми чорабинӣ ба оилаҳо сипосномаҳо ва туҳфаҳои хотиравии мақомоти иҷроияи ҳокимияти давлатии шаҳр супурда шуданд. Барномаи фарҳангӣ бо иштироки ҳунармандон ва гурӯҳҳои эҷодӣ ба маҳфил шукуҳи бештар бахшид.

Ба гуфтаи таҳлилгарон, дар шароити тағйироти босуръати иҷтимоӣ дастгирии институти оила дар Тоҷикистон аҳамияти бештар пайдо мекунад. Оила ҳамоно василаи асосии интиқоли арзишҳои фарҳангӣ, таҳкими суботи ҷомеа ва тарбияи ҷавонон дар рӯҳияи эҳтиром ба таърих, суннат ва ҳувияти миллӣ боқӣ мемонад.

АКС: Мақомоти иҷроияи маҳаллии ҳокимияти давлатии шаҳри Панҷакент