Душанбе, 18 май, – АИ «Корвон Иттилоот». Дар шаҳри Душанбе маросими ҷоизасупорӣ ба ғолибони даври шаҳрии озмуни «Оилаи беҳтарин» баргузор гардид — чорабинӣ, ки на танҳо як мусобиқаи рамзӣ, балки нишонаи таваҷҷуҳи пайвастаи давлат ба таҳкими ниҳоди оила ва арзишҳои миллӣ маҳсуб мешавад.

Оила чун асоси ҷомеа дар фарҳанги тоҷикӣ ҳамеша мавқеи меҳварӣ дошт. Имрӯз низ, дар шароити дигаргуншавии муносибатҳои иҷтимоӣ, афзоиши талабот ба маърифати оиладорӣ ва масъулияти падару модар, ин ниҳод аз муҳимтарин самтҳои сиёсати давлатӣ боқӣ мемонад. Маҳз дар ҳамин замина мақомоти иҷроияи ҳокимияти давлатии шаҳри Душанбе бо мақсади татбиқи Барномаи давлатии рушди оила дар Ҷумҳурии Тоҷикистон барои солҳои 2024-2028 озмуни «Оилаи беҳтарин»-ро роҳандозӣ кард.

Тавре аз мақомоти пойтахт хабар доданд, озмун дар ду давр баргузор шуда, аввал ғолибони ноҳиявӣ муайян гардиданд ва сипас беҳтарин оилаҳо ба марҳилаи шаҳрӣ роҳ ёфтанд. Барои баррасии нишондиҳандаҳо комиссияи махсус таъсис дода шуда, он аз рӯйи меъёрҳои мушаххас, аз ҷумла муҳити солими оилавӣ, тарбияи фарзандон, эҳтироми ҳамдигар, иштироки фаъол дар ҳаёти ҷамъиятӣ, саҳм дар ободонии маҳал ва ҳифзи арзишҳои фарҳангии миллӣ фаъолият бурд.

Маросими ҷоизасупорӣ 15 майи соли 2026 дар толори Раёсати фарҳанги шаҳри Душанбе бахшида ба Рӯзи байналмилалии оила ва ақди никоҳи 10 ҷуфт навхонадорон баргузор гардид. Дар он муовини якуми Вазири адлияи Ҷумҳурии Тоҷикистон Асадулло Ҳакимзода, муовини якуми раиси Кумитаи кор бо занон ва оилаи назди Ҳукумати Ҷумҳурии Тоҷикистон Набизода Мадина Раҳмат ва муовини раиси шаҳри Душанбе Одилзода Дилбар Раҳим иштирок ва суханронӣ намуданд.

Дар суханрониҳо таъкид шуд, ки Ҳукумати Ҷумҳурии Тоҷикистон барои таҳкими заминаҳои ҳуқуқӣ ва иҷтимоии оила маҷмуи санадҳои меъёрӣ, аз ҷумла кодексҳои оила, ҷиноятӣ, ҳуқуқвайронкунии маъмурӣ, тандурустӣ ва меҳнат, инчунин қонунҳо «Дар бораи пешгирии зӯроварӣ дар оила», «Дар бораи масъулият барои таълиму тарбияи кӯдак» ва «Дар бораи танзими ҷашну маросим дар Ҷумҳурии Тоҷикистон»-ро қабул кардааст.

Ғолибони озмун чунин муайян шуданд: Ҳусейнов Мирзо Боқиевич ва Мадалиева Истамой Ашурбоевна аз ноҳияи Сино — ҷойи якум; Сафаров Бахтиёр Раҷабович ва Ғоибзода Саодат Ғоиб аз ноҳияи Шоҳмансур — ҷойи дуюм; Маҳмудов Давлатшоҳ Хайруллоевич ва Зокирова Меҳрангез Баҳромовна аз ноҳияи Исмоили Сомонӣ — ҷойи дуюм; Ахметов Фаёзиддин Сотимбоевич ва Умарзода Саида Ғайрат аз ноҳияи Сино — ҷойи сеюм; Сайдалиев Назрихуҷа Назруллоевич ва Хайриддинзода Мулиён аз ноҳияи Фирдавсӣ — ҷойи сеюм; Шукуров Зафарҷон Ҳаидбоевич ва Раҳимова Саидахон Абдулатифовна аз ноҳияи Сино — ҷойи сеюм.

Ба ғолибон диплом ва ба дигар иштирокчиён сипоснома ва туҳфаҳои хотиравии Мақомоти иҷроияи ҳокимияти давлатии шаҳри Душанбе тақдим гардид.

Манбаи акс: Мақомоти иҷроияи ҳокимияти давлатии шаҳри Душанбе