Душанбе, 25 сентябр, – АИ «Корвон Иттилоот». Дар Тоҷикистон мавсими дуюми лоиҳаи байналмилалии «Олимони оянда» ҷараён дорад. Аз 21 то 25 сентябр олимон ва омӯзгорони донишгоҳҳо ва ташкилотҳои илмии пешрафтаи Русия барои донишҷӯён, мутахассисони ҷавон ва муҳаққиқон лексияҳо ва мастер-классҳо мегузаронанд.

Иштирокчиён бо тадқиқот ва коркардҳои муосири илмӣ шинос мешаванд, ба коршиносон савол медиҳанд ва мавзӯъҳоро аз зеҳни сунъӣ ва иқтисод то илмҳои гуманитарӣ ва омӯзиши забони русӣ муҳокима мекунанд. Барои муҳаққиқони ҷавон ин инчунин имкони шинос шудан бо ҳамкорон ва муҳокимаи идеяҳо барои лоиҳаҳои муштараки оянда аст.

Лексияҳо ва мастер-классҳо дар донишгоҳҳои Душанбе ва Бохтар баргузор мегарданд ва донишҷӯён, омӯзгорон ва муҳаққиқони ҷавонро аз соҳаҳои гуногун муттаҳид месозанд.

Лоиҳаи «Олимони оянда» бо ташаббус ва дастгирии Вазорати илм ва таҳсилоти олии Федератсияи Русия, бо мусоидати Вазорати корҳои хориҷии Русия, Россотрудничество ва портали «Наука.рф» амалӣ мегардад. Ташкилкунанда — Институти давлатии забони русии ба номи А. С. Пушкин аст.

Баргузории мавсими дуюми лоиҳа дар Тоҷикистон ба таҳкими робитаҳои илмӣ-таълимӣ байни ду кишвар, васеъ кардани дастрасии ҷавонон ба донишҳои мубрам ва эҷоди шароит барои тадқиқоти муштарак мусоидат мекунад.

Чунин ташаббусҳо дар рушди потенсиали зеҳнӣ ва амиқтар кардани шарикӣ дар соҳаи илм ва таҳсилоти олӣ нақши муҳим мебозанд.

Акс: Хонаи русӣ дар Душанбе