Душанбе, 12 май, – АИ «Корвон Иттилоот». 9 май Президенти Ҷумҳурии Тоҷикистон, Асосгузори сулҳу ваҳдати миллӣ — Пешвои миллат муҳтарам Эмомалӣ Раҳмон ба хабарнигори Агентии иттилоотии «Синхуа»-и Ҷумҳурии Мардумии Чин Ан Сяомэнь мусоҳиба дод.

Ин суҳбат бори дигар собит кард, ки муносибатҳои Тоҷикистону Чин имрӯз на танҳо дар сатҳи тамосҳои расмӣ, балки ҳамчун шарикии устувори стратегӣ рушд мекунанд, ки бар пояи эътимод, манфиатҳои муштарак ва рӯзномаи ягонаи суботи минтақавӣ такя дорад.

Сарвари давлат ба саволҳо дар бораи вазъ ва дурнамои муносибатҳои Тоҷикистон ва Чин, инчунин муколама дар сатҳи олӣ ва баланд миёни ду кишвар посух дод. Таваҷҷуҳи хоса ба дастовардҳои асосии Созмони ҳамкории Шанхай ва нақши Тоҷикистон ва Чин дар доираи ин сохтор зоҳир гардид. Ин масъала дар шароите муҳим аст, ки СҲШ бештар ба яке аз минбарҳои калидӣ барои баррасии масоили амният, рушд ва ҳамкории мутақобила дар фазои АвруОсиё табдил меёбад.

Дар мусоҳиба ҳамчунин натиҷаҳои ташаббуси муштараки таъсиси «Камарбанди иқтисодии Роҳи абрешим» баррасӣ шуданд, ки дар солҳои охир ба рамзи марҳалаи нави пайвастагии авруосиёӣ табдил ёфтааст. Барои Тоҷикистон ин на танҳо имкониятҳои нақлиётӣ ва тиҷоратӣ, балки дастрасии васеътар ба сармоягузорӣ, технология ва табодули гуманитарӣ низ мебошад.

Ба вазъ дар бахши амният, субот ва рушд дар минтақа ва ҷаҳон, инчунин ба густариши равобити гуманитарӣ миёни ду кишвар низ таваҷҷуҳи махсус дода шуд. Дар ин замина марказҳои Конфутсий ва устохонаи Лу Бань дар Тоҷикистон ҳамчун абзорҳои амалии таҳкими ҳамкории омӯзишӣ ва фарҳангӣ таъкид гардиданд.

Мусоҳибаи Эмомалӣ Раҳмон бо «Синхуа» нишон дод, ки гуфтугӯи Тоҷикистону Чин кайҳо аз доираи рӯзномаи сиёсӣ фаротар рафта, ба ҷузъи меъмории дарозмуддати ҳамкории минтақавӣ табдил ёфтааст.

АКС: Хадамоти матбуоти Президенти Ҷумҳурии Тоҷикистон