Душанбе, 09 май, – АИ «Корвон Иттилоот». Дар Тоҷикистон Рӯзи Ғалаба то имрӯз на танҳо як санаи муҳими таърихӣ, балки бахши муҳими ҷаҳонбинӣ ва худшиносии маънавии насли ҷавон боқӣ мемонад. Дар арафаи 9 Май ҷавонони фаъол, донишҷӯён, рӯзноманигорон ва омӯзгорон назари худро дар бораи аҳамияти Ғалаба ва хотираи Ҷанги Бузурги Ватанӣ баён карданд.
Аксари иштирокчиёни назарпурсӣ таъкид намуданд, ки барои онҳо 9 Май пеш аз ҳама рамзи эҳтиром ба қаҳрамонӣ ва фидокории инсонҳое мебошад, ки барои сулҳу озодӣ ҷони худро нисор карданд. Ба гуфтаи онҳо, Рӯзи Ғалаба на як ҷашни расмӣ, балки ёдоварӣ аз арзиши сулҳ, субот ва матонати инсонӣ мебошад.
Ғолиби озмуни «Хонандаи сол – 2025» Нушофарин Раҷабзода Рӯзи Ғалабаро рамзи хотираи шуҷоат ва ҷоннисории насли ғолибон номид. Ӯ гуфт, маҳз бо шарофати онҳо имрӯз ҷавонон дар фазои сулҳу оромӣ зиндагӣ мекунанд.
Корманди «Радиои Тоҷикистон» Қосим Ватанов иброз дошт, ки эҳтиром ба ин сана ҳанӯз аз давраи мактабӣ тавассути нақли калонсолон дар зеҳни ҷавонон шакл мегирад. Ба гуфтаи ӯ, хотираи қаҳрамонони ҷанг бояд ҳамчун қисми муҳими мероси таърихии миллат ҳифз шавад.
Донишҷӯ Дурдона Қодирӣ бар он назар аст, ки Рӯзи Ғалаба ҷомеаро водор месозад, то қадри сулҳу оромиро бидонад ва барои ҳифзи субот талош намояд. Ӯ ҷангро дарси муҳими таърихӣ барои наслҳои оянда медонад.
Корманди рӯзномаи «Пайрав» Раҳимҷони Ватанқул гуфт, ки аҳамияти воқеии ҷангро баъд аз мулоқот бо собиқадорон амиқтар дарк кардааст. Ба гуфтаи ӯ, нақли иштирокчиёни ҷанг ба ҷавонон имкон медиҳад, ки арзиши воқеии Ғалабаро эҳсос намоянд.
Иштирокчии Озмуни ҷумҳуриявии «Ватанпарвар» Ширинмоҳ Шоҳимзода 9 Майро рамзи пирӯзии некӣ бар бадӣ ва ёдоварӣ аз қурбониҳои бузурги роҳи сулҳ арзёбӣ кард. Ӯ таъкид намуд, ки ҳифзи сулҳу ваҳдат масъулияти умумии ҷомеа мебошад.
Омӯзгор Нуриддин Нурзода гуфт, ки паси калимаи «ғалаба» фоҷиаи ҷанг, талафоти инсонӣ ва сарнавишти миллионҳо нафар қарор дорад. Ба гуфтаи ӯ, Рӯзи Ғалаба бояд на танҳо санаи ҷашнӣ, балки рӯзи андеша дар бораи арзиши сулҳ бошад.
Имрӯз, дар ҳоле ки Ҷанги Бузурги Ватанӣ тадриҷан ба хотираи таърихӣ табдил меёбад, чунин назари ҷавонон нишон медиҳад, ки мавзӯи Ғалаба ҳамоно бахши муҳими худшиносии миллӣ ва омили пайванди наслҳо боқӣ мемонад.
АКС: Сафиаллох Ибодзода, «ҶТ»