Душанбе, 21 июл, – АИ «Корвон Иттилоот». Дар Тоҷикистон татбиқи сиёсати рақамикунонии бахши кишоварзӣ идома дорад. Дар доираи лоиҳаи аз ҷониби Агентии ҳамкории байналмилалии Корея (KOICA) маблағгузоришавандаи «Ҷалби деҳқонони ҷавони хоҷагиҳои хурд тавассути агротехнологияҳо барои таҳкими амнияти озуқаворӣ ва рушди занҷираҳои арзиш» семинар-омӯзиши махсус оид ба истифодаи технологияҳои рақамӣ дар соҳаи кишоварзӣ баргузор гардид.

Ташкилкунандагони чорабинӣ Корхонаи воҳиди давлатии «Маркази рақамикунонӣ ва такмили ихтисоси кормандони соҳаи кишоварзӣ» назди Вазорати кишоварзии Ҷумҳурии Тоҷикистон дар ҳамкорӣ бо Донишгоҳи аграрии Тоҷикистон ба номи Шириншо Шотемур ва ташкилоти ҷамъиятии «Нексигул Мушовир» буданд.

Дар семинар зиёда аз 100 нафар намояндагони мақомоти давлатӣ, муассисаҳои илмӣ, бахши хусусӣ ва деҳқонони ҷавони хоҷагиҳои хурд иштирок намуда, масъалаҳои рушди инноватсионии соҳаи кишоварзӣ ва густариши истифодаи технологияҳои рақамиро мавриди баррасӣ қарор доданд.

Дар рафти муҳокимаҳо иштирокчиён дурнамои рақамикунонии соҳаи кишоварзии Тоҷикистон, татбиқи технологияҳои муосири аграрӣ, истифодаи бесарнишинҳо дар истеҳсолоти кишоварзӣ, такмили ихтисоси мутахассисони соҳа ва таҳкими ҳамкории давлат бо бахши хусусиро баррасӣ намуданд.

Дар қисми амалии чорабинӣ як қатор ҳалли рақамии нав барои дастгирии фаъолияти деҳқонон муаррифӣ гардид. Аз ҷумла, лоиҳаҳои харитасозии рақамии заминҳои кишоварзӣ, низоми мониторинги нархҳои бозор, чат-ботҳои машваратӣ барои деҳқонон, замимаҳои мобилӣ ва платформаҳои минтақавии рақамӣ пешниҳод шуданд.

Ба гуфтаи ташкилкунандагон, чунин чорабиниҳо барои табодули дониш, омӯзиши таҷрибаи пешқадам ва таҳкими ҳамкории байни мақомоти давлатӣ, муассисаҳои илмӣ, бахши хусусӣ ва истеҳсолкунандагони маҳсулоти кишоварзӣ мусоидат менамоянд.

Рақамикунонии кишоварзӣ тадриҷан ба яке аз самтҳои асосии навсозии иқтисоди Тоҷикистон табдил меёбад. Истифодаи технологияҳои рақамӣ, зеҳни сунъӣ, дастгоҳҳои бесарнишин ва хизматрасониҳои мобилӣ метавонад ҳосилнокиро афзоиш дода, хароҷоти истеҳсолиро коҳиш диҳад ва устувории бахши кишоварзиро дар баробари тағйирёбии иқлим ва хавфҳои бозорӣ тақвият бахшад.

Ҷалби деҳқонони ҷавон ба ин раванд аҳамияти махсус дорад, зеро маҳз онҳо метавонанд неруи асосии татбиқи технологияҳои нав дар минтақаҳо гарданд. Ҳамкории шарикони байналмилалӣ бо мақомоти давлатӣ, муассисаҳои илмӣ ва бахши хусусӣ барои ташаккули экосистемаи рақамии кишоварзӣ заминаи устувор фароҳам меорад.

Дар доираи татбиқи сиёсати давлатии рақамикунонии иқтисод, чунин ташаббусҳо метавонанд ба навсозии соҳаи кишоварзӣ, баланд бардоштани рақобатпазирии маҳсулоти ватанӣ ва таҳкими амнияти озуқавории Тоҷикистон мусоидати назаррас намоянд.

Акс: Вазорати кишоварзии Ҷумҳурии Тоҷикистон / KOICA