Душанбе, 19 феврал, – АИ «Корвон Иттилоот». 18 феврали соли 2026 Президенти Ҷумҳурии Тоҷикистон, Пешвои миллат муҳтарам Эмомали Рахмон мардуми кишварро ба муносибати фарорасии моҳи шарифи Рамазон табрик гуфта, аҳамияти маънавию ахлоқии онро таъкид намуд.

Сарвари давлат Рамазонро моҳи баракату фаровонӣ, некиву саховатмандӣ, сабру таҳаммул, омурзиши гуноҳҳо ва ҳидояти инсонҳо ба амалҳои шоиста арзёбӣ кард. Ба таъкиди ӯ, ин моҳ фурсати поксозии ботин, таҳкими арзишҳои ахлоқӣ ва зоҳир намудани беҳтарин хислатҳои инсонӣ мебошад.

«Ба ҳар як оилаи тоҷик зиндагии орому осуда, бахту саодат ва дар ҳамаи корҳои нек комёбӣ орзумандам», — зикр намуд Пешвои миллат.

Ба гуфтаи Президенти мамлакат, моҳи шарифи Рамазон дар таълимоти дини мубини ислом мавқеи хос дорад, зеро Худованди мутаъол дар ин моҳ сабру таҳаммул, муҳаббату меҳрубонӣ, некӣ ва саховатро дар радифи дигар ибодатҳо мақоми вижа бахшидааст.

Ин муроҷиат дар шароите садо дод, ки Тоҷикистон сиёсати таҳкими ҳамзистии осоишта, эҳтиром ба арзишҳои маънавӣ ва пуштибонии суннатҳои динӣ ва ахлоқии ҷомеаро пайгирона амалӣ менамояд. Дар фарҳанги миллӣ Рамазон на танҳо моҳи рӯза, балки айёми ҳамдилӣ, кумак ба ниёзмандон ва таҳкими ваҳдати иҷтимоӣ маҳсуб меёбад.

Табрики Пешвои миллат бозгӯи аҳамияти сулҳу субот, эҳтироми мутақобил ва худтакмилдиҳии маънавӣ дар ҷомеаи муосир мебошад.

АКС: Хадамоти матбуоти Президенти Ҷумҳурии Тоҷикистон